【傑。斯與晴】帶着小B去旅行。大阪遊。Day Pass行（上）。海遊館（含影片及介紹）
2017-11-10
今次帶着小B遊大阪嘅旅程話咁快又完結咗，
呢一次嘅旅程雖然遇上颱風，
搞到有好多地方都去唔到，
同時亦要Delay行程，比原定時間遲咗一日先返到香港，
但旅程中見證着小JM嘅成長點滴，可謂此刻無價！
因為打風嘅關係，行程有所改變，
但仍然帶咗小JM去海遊館、Legoland、EXPO City等，
小JM都玩到樂而忘返，見到小JM咁開心，媽媽同爸爸都好滿足呀。
一提起大阪，我諗好多人都會諗起購物、美食同美景。
無錯！
當地真係有好多大小唔同嘅100 YEN店、Outlet同藥妝店，
除咗呢啲之外，大阪仲有好多啱晒一家大細去嘅景點架，
真係多到有排都玩唔晒添架！
除咗購物同景點，當然唔少得嘅就係大阪嘅美食啦，
有幾個市場真係非去不可架！
緊係啦，話晒大阪都係日本第二大嘅港口城市呀嘛，
仲係日本東西行嘅交通樞紐添，所以去玩都一樣好方便架！
今次嘅旅程主要都係市內，車程唔算太耐，所以都無租到車，
爸爸今次可以放輕鬆一齊玩啦！
接住落來就會為大家一一介紹一啲好去處，
希望你地有機會都可以帶小B一齊去睇、去玩、去放電啦！
係出發之前有一件好重要嘅事要做！
就係。買。Day Pass！
Day Pass小簡介
Day Pass分兩種：「一日劵」及「兩日劵」
可以按行程需要而選購啱用嘅Day Pass喔！
一日劵。1 Day Pass (2,500 YEN)
可以自由搭乘大阪市營地鐵 、新電車、
所有路線嘅巴士以及大阪市區既阪急、阪神、京阪、近鐵和南海電鐵。
兩日劵。2 Day Pass (3,300 YEN）
可以連續兩日自由搭乘大阪市營地鐵 、新電車、
所有路線嘅巴士以及大阪市區嘅阪急、阪神、京阪、近鐵和南海電鐵。
小提示：
－ Day Pass係無兒童版架，三歲以下嘅小B們都係唔需要買飛架！
－ Day Pass唔可由南海國際機場站開始使用喔！
－ Day Pass 嘅使用時間會以當日首班車及尾班車作準，而唔係以時間為限
所以並非啟用後既24小時或48小時喔，要多注意喔！
－ 購買Day Pass會有一個Kit set喔，內裏仲附有一本指南手冊及一套優惠喔！
超值Day Pass優惠：
－ 可免費使用指定設施
－ 可以免費乘搭指定路線
－ 可享指定店舖購物優惠
－ 可以用優惠價享用設施
－ 可享醫療服務
就今次嘅行程而言，我哋買咗「一日劵」1-Day Pass。
用咗1-Day Pass原來去海遊館同Legoland都一樣會有優惠架！
海遊館優惠：每位成人獲得100YEN 減免。
好啦，事不宜遲，出發去「海遊館」！
海遊館小簡介：
海遊館於1990年開立，座落於大阪府大阪市港區嘅天保山港灣村。
隔離就有一個Shopping Mall，睇完去食嘢買嘢都一樣好方便，
而Legoland都係呢個shopping mall入面，近近地又可以多一個放電嘅好地方！
海遊館係一個以「環太平洋火山帶」及「環太平洋生命帶」為主題嘅海洋展覽館。
館內設有15個以上嘅大水槽，而最大嘅足足有成5400立方公尺添！
唔單止咁，海遊館入面仲有被指為世界上最大體型嘅魚 － 鯨鯊！
館內除咗有多個不同品種嘅魚類之外，仲有海豹、企鵝、水瀨、水母等嘅生物添！
喺海遊館內設有體驗館，唔單止可以用眼去「睇」，
仲可以用手去「摸」、去零距離「接觸」魔鬼魚同鯊魚添，
只要你夠膽就可以架啦！
海遊館資料：
地址： 港區海岸通1-1-10
開放時間： 10:00～20:00 （最終入場至結束前1小時）（根據季節會有所變動）
入場收費： 16歲以上 2,300YEN＠
3歲以下免費
Day Pass每位成人門票折價100日圓
＊只限於售票窗口以現金方式購買使用＊