【張慧敏】大T答讀者
2017-11-29
早前收到編輯轉寄讀者傳來的電郵，說很想聯絡大T，原來一位讀者媽媽知道大T去韓國讀書的經過，說應屆DSE考生的女兒成績肯定不能夠入讀本地大學。希望知道入讀語學堂的途徑、升讀韓國大學須知等等。大T如何回答，答案可在此網站的海外升學中找到。我想和大家分享的，是我們兩母女就此問題作的討論。
辣媽：「家姐，有個讀者嘅媽媽寫咗電郵去編輯度，問有冇方法聯絡你，想問你佢個女去韓國讀書嘅途徑同埋意見。你睇吓佢封電郵點寫，睇完之後話我知你有冇興趣答佢。」
大T：「媽咪我睇完啦！預想個女成績一般，就想來韓國讀書，佢有冇諗過成績唔好人哋唔一定會收？佢好似好理想化咗成件事咁， DSE考得唔好香港冇大學讀，就可以成日讀書搞掂？究竟係佢想個女來韓國繼續讀書，定真係佢個女想嚟？如果佢個女真係鍾意真係好想，點解唔係佢自己先做定功課，自己直接寫嚟問，而係佢阿媽代佢問？」
辣媽：「呢個現象喺香港極之非常咁普遍，就係樣樣事仔女都闊佬懶理，啲阿爸阿媽就發晒神經咁緊張。我都唔知呢個究竟係社會嘅錯定係父母嘅錯定係我哋全部都有錯。由細到大讀乜嘢做乜嘢學乜嘢全部都有父母安排妥當，做仔女嘅完全唔需要理會，不過其實亦冇得話事，反正一唔聽佢哋話做就係唔乖唔啱㗎啦！」
大T：「都唔係佢個女自己想知，而且我之前幾篇文都已經寫過去韓國讀需要知道嘅嘢啦，我唔知點解要再答。」
辣媽：「咁你咪直話直講將你心中想講嘅說話全部寫出嚟公開答佢一次，順便俾其他讀者睇都好呀！」
大T：「咁要幾時交？」
辣媽：「幾時交冇問題，唔使急，最緊要快！」
以上是我們真實對話，有減少冇加多！如果大家有時間睇埋家姐的回答，更能體會我此刻的心情。套用我在面書分享家姐文章的hashtag，＃大T果有乃母之風。在此我要加多句，虎母果然無犬女，＃多得我阿媽！
作者：張慧敏
網上圖片：延世大學韓國語學堂
其他文章: