日期 | 全年適用 |
上次嚟西園正係入夏時,仲記得玩弓防箭時身水身汗,今次秋冬到西園,著起全副武裝,陣地換咗去魔鬼森林,氣氛有別於上一次,更加認真好玩,好緊要係唔駛流汗好舒服!
重覆嘅嘢就唔多講,大家可以番去爬舊文,睇番我哋第一次西園之行
仲有可以去睇番上回提要,可以去呢度睇 www.ohpama.com/250442/
天氣凍,一家四口瞓喺暖笠笠被鋪裏面真係唔捨得起身,但係又要快快去食個早餐,再開始今朝嘅兩個活動
一大清早起咗身,同哥哥出去走走,呀芊同媽咪女仔人家係要搞耐D。
西園內的魚菜共生系統非常大
有機會都叫負責人帶我哋導賞一下
又靚又環保!如果可以俾我捉番條魚嚟燒就好
這邊的工地似乎正施工,但都見9成面貌,睇字 “Experimental Farm” 即係實驗農場啦
應該又一個新活動可以俾一家大細喺度享受田園種植樂趣,問過開緊工的叔叔,後面個架係用嚟種瓜。呢個鐵水喉稻草人,我諗將來又會成為一個打卡景點
到咗8:30嗱嗱聲跑去食早餐(Glamping營區已包括了早餐)
簡簡單單的早餐,呢個咁舒服嘅環境底下變得一D都唔簡單
一家人仲食得好開心,小朋友食食吓又跑出去玩,玩完又番嚟食過
食食吓見到一群羊跑出嚟食早餐,芊芊就嗌住我,要我陪佢一齊去餵羊
手執住幾棵葉就拎去餵,成群羊走埋去芊芊度嚇到佢閃開,又要餵又要驚…
非常大自然,小朋友唔使隔住個圍欄去餵佢哋
芊芊特別對細小嘅羊照顧,見又大又老嘅羊,就唔餵佢哋…只餵白雪雪嘅小羊咩
芊:「我唔係俾你食架!唔好搶我條草呀!」