日期 | 全年適用 |
今次大阪の旅又一次見證住小JM嘅成長,
原來小JM都算幾叻嘅(某程度而言),
至少唔會喺飛機上面大吵大鬧或者扭計,
都會俾番幾分薄面我哋兩位,
食飽一上機就會好乖乖咁瞓,
俾人嘈醒咗都唔會喊或扭計。
講到搭飛機,
為咗令到大家都可以得到安靜嘅飛行旅程,
我哋都會為小JM預備定一個「手邊袋」。
「手邊袋」,其實意義係指隨手就拎到嘅袋,最緊要係方便。
手邊袋入面會有小JM嘅隨身物品、食物、玩具等。
(如果有需要可以下載「手邊袋」Check List喔!)
就今次旅程而言,小JM嘅手邊袋就有以下物品:
-尿片褲
-紙巾 及 濕紙巾
-消毒潔手液
-BB零食 及 果乾
-BB飲品 或 水
-公仔、玩具
-貼紙書、繪本
或者你睇到呢度會問:點解可以帶BB零食同飲品嘅?
其實只要同行有一位36個月以下嘅小朋友同行就可以帶架啦。
不過安檢人員有權要求小朋友即場試飲飲品,以示飲品嘅安全性。
母乳媽媽。小提示:
而因為小JM係母乳BB,
所以係我哋第一次帶小JM出遊嗰陣就已經事先查詢咗有關攜帶母乳上機嘅問題。
(嗰陣小JM係九個月大。^^。)
而根據機場管理局嘅講法而言,
如果同行有 36個月以下嘅小B一齊搭飛機既話,
同行嘅成人就可以有母乳上機,而且數量不設限。
而雖要攜帶雪藏母乳嘅話,
只可以帶唔超過2.5千克嘅乾冰上機。
但係登機同安檢嘅時候必須知會機場人員,以免引起不必要嘅誤會。
希望以上嘅小小資訊及分享可以幫到大家啦!^^