【和牛b】媽媽有感:回憶我的269天孕期
2017-12-29
諗番起想當年未做人母嘅我,其實係好唔鍾意小朋友,我覺得佢哋好麻煩,覺得佢哋係小魔怪。
雖然一心唔想生,但係當年數下手指,自己都好快會奔3,所以要認真計劃一下…
但生BB之前,我身體都算唔錯丶健康,唯獨是M期成日都唔準…所以就試下去睇中醫到調理一下先啦~
醫師話我身體都幾健康~只需重點調經就可以。大概3個月,其實M期都已經準番晒。
當M期都準番之後,就開始不設房,點知話咁快就BINGO咗!! 諗番起去到懷孕第5週嘅時候,嗰時我仲未知道有咗。但我開始有啲反應,飲凍嘢會覺得下腹有少少陰陰痛,但好快就唔痛。返工追車跑完下腹又會有少少痛,食咗韮菜之後有作嘔嘅感覺,再加上本來已經tune番準時到嘅M,又遲咗…遲咗…遲咗。於是我懷住興奮又緊張嘅心情去驗孕~~嘩嘩嘩~~第一條線好快出現,第二條線..勁慢勁慢..仲要若隱若現!! 我開心到差啲喺廁所到大嗌出嚟~勁興奮!! 係兩條線呀!! 只係第二條線淺色啲!! 朋友話,淺色嘅原因係因為懷孕太初期啦,所以會咁!!
即刻打開廁所門同老公講,中咗中咗!! 我真係有咗,點知睇梗電視老公出奇地冷靜,冇晒表情…呢一刻我覺得我老公其實係咪唔想要? 點知隔咗差唔多一個鐘,原來老公係擔心緊「錢」。佢都好開心嘅,但一時之間反應唔切。
第二日,在去診所度驗多一次,confirm一下係咪真係bingo~真嘅!!我無發夢真係中咗~~~醫生仲嗌我快啲決定去邊間醫院度生,快快去排期添呀~~夜晚我即刻同老公講,我要決定去QE生。最初其實有考慮廣華定QE,但最終都係揀咗QE~因為QE好彩嘅話係可以照結核~慳返幾千蚊~
除咗去政府醫院排隊之外,好多朋友都話最好去埋私家兩邊CHECK住BB嘅情況,所以我就搵多個私家去CHECK住~其實每次去私家,我哋2公婆都好開心好興奮~因為每次都可以見到BB,每次去都有唔同~~由初初一粒閃閃下嘅豆豆,變到睇得出人形,有手有腳,望到有手指,肚dom仔~個感覺真係好奇妙~
體重方面,我就冇乜點樣增長到,終極到生為止其實我只係重咗10磅左右。至於腰圍去到生嗰陣,就足足粗咗13吋!! 個肚仲要又圓又長呀~~~打橫睇成個飛機欖咁~
成個孕期,最開心係老公將我當公主般呵護~上車落車都會攙扶我,冇BB 嗰時點會丫…一落車佢望都唔望下我就自己行咗去啦…理得我行去邊丫。夜晚大肚婆最興抽筋,當然我都走唔甩…明明佢好難會扎醒ge人,聽到我慘叫”老公,抽筋呀,好痛呀!!”佢就會即刻醒~而家…阿女喊到拆咗天,佢都冇反應…除咗咁,每次我話唔舒服,本身要出街佢都會唔強迫我, 俾我喺屋企好好休息,每餐想食乜都係我話事~總之無比溫暖同溫韾呀~