【鄭小B之成長日誌】太子參排骨湯
2018-01-10
早在放聖誕長假期之前，小b鼻敏感引發鼻水倒流，又咳又痰又鼻水又鼻塞，好一段時間，晚上瞓瞓下都會咳醒，仲咳到嘔。
無法啦！好番啲去返學，始終避免唔到交叉感染，加上天氣又唔穩定，睇咗幾次醫生都清唔到。
最後轉咗睇另一個醫生，敏感加上感冒，支氣管仲有啲發炎，要聞氣食壯氣管藥。醫生叮囑水果唔食得，最多只可以食蘋果，但要蒸5分鐘先食得！仲要4日換一次牀單，60度水去洗呀！
更叮囑一星期都唔可以飲湯 (其實媽媽都知傷風咳感冒唔好飲湯，但醫生叮囑都是第一次)！
所以媽媽足足兩個星期多都無煲湯俾爸爸同小b兩隻湯怪飲！
直到小b完全好番，媽媽就煲咗呢個太子參湯，幫小b病後修護番，調理番身體，增強番免疫力。
太子參: 又稱孩童參，性質溫和，補而不燥，可以用於病後修護、調理身體，亦有助增強免疫力。
沙參: 清熱養陰，潤肺止咳。
海竹頭: 補而不燥、滋養氣血、生津。