【廣華走佬袋】實用篇＋私人Tips！

不過睇完都覺得唔係好實在，所以自己都係base on呢個list再加加減減

身份証、少量現金、8達通、覆診紙等等就長期帶定係身邊！

我就準備咗兩袋放咗喺廳，一見紅／穿羊水就即刻拎住佢哋暴走！大家最好都用個大D嘅袋，唔好用幾個袋分開拎，一嚟好易漏，二嚟一袋過方便好多架！

首先講下媽媽有咩啦！

呢一Part我會稱為一定一定要帶！因為其他嘢唔帶都仲可以叫屋企人即刻拎，但呢一堆都係一生完就要即刻用！市面上，有好多一pack過嘅走佬袋所需要嘅嘢賣，例如六甲村、佩儷等。我呢個六甲村係之前奶奶係Aeon買定嘅我嘅，帶晒去都穩陣架喇！另外，我都準備咗用開嘅Skin Care去，雖然未必有時間用，但醫院冷氣都會抽乾皮膚水分，到時一乾心情都會唔好。牙刷我帶咗喺酒店用嘅牙刷同用完就Dump得嘅杯，咁出院又可以執少樣嘢！

另外，有個私人tips俾大家！就係帶埋消毒紙巾同濕廁紙，消毒紙巾係俾你抺廁板用，生完最好都保持乾淨啦，始終廁所都多人用吖嘛！而我會用濕廁紙取代廚房紙，去完廁所用沖洗器洗一洗，再用濕廁紙清潔，又乾淨又可以沖落廁所，加上濕廁紙Soft D，我哋都舒服D！

呢一part就係次需要嘅嘢，個袋有位都放埋啦！醫院大家都知唔俾用插頭架喇，所以帶定個充電器去啦。另外，乳墊都可以準備定，始終唔清楚自己嘅奶量會點，有時可能會漏少少，所以帶定穩陣D！而呢一隻濕紙巾係俾我哋餵完奶清潔番個乳頭，BB同媽媽都可以用架！可能你會發現我係無放到拖鞋入去，因為我打算直接著拖鞋去醫院，最緊要搵定一對防滑拖鞋，唔好用酒店個D薄薄拖鞋啊！如果會沖涼嘅媽媽就要帶埋淋浴露（不過都建議唔好沖，因為都係生水嚟，等返屋企個陣用薑水先沖涼洗頭啦！）不過都可以帶定毛巾去抺身！

到阿B個袋其實好少嘢，最緊要帶尿片俾佢用！另外，先帶一卷廚房紙，因為係用嚟代替紗巾，幫BB抺下奶咁。之後，手襪仔一定要拎定，BB出世唔習慣，加上面仔可能會痕，到時可以俾佢佢帶住，唔好R損塊面！同BB濕紙巾係用嚟抺佢patpat嘅，我媽媽話最好帶個盤去，柯完Poopoo可以用暖水幫佢洗下，會舒服過用濕紙巾。我都帶定一枝body lotion俾BB用，如果皮膚乾／痕都可以搽下吖嘛！

出院嗰陣嘅衫，可以再請老公到時帶俾你同BB！

BB出院衫：和尚袍、羊毛冷衫仔（冬天）、衫仔一件、厚身嘅連身衫、厚嘅包被、帽仔、手襪仔等！
（生完有咩物資再需要，將會再更新！）

話咁快就結束呢十個月，真係好唔捨得，唔知啊B會早出嚟定遲出嚟呢！真係好緊張好期待！做媽媽無咩要求，最緊要健健康康，開開心心咁成長我就好滿足架喇！

Facebook：https://www.facebook.com/90sMummy/
Instagram: https://www.instagram.com/minarainlo/

作者：90後P牌媽咪