×

Home

 

廿四孝熱話文章打印

來自網址: http://www.ohpama.com/?p=266218

有心食譜 February 9, 2018

【小小豬】龍脷葉枇杷葉桔餅茶

依幾日我都有點點作病,有少少咳又有啲痰困住咁,都真係唔多舒服。趁初起就當然係煲啲止咳化痰嘅湯水飲下,希望可以順下啖氣。原本都係打算去買少少龍脷葉嚟煲蘋果湯,不過藥材店店主就介紹咗我煲依個龍脷葉枇杷葉桔餅茶,佢話可以快啲清下啲痰,咁次次佢介紹都唔錯,所以就聽話執一份材料試下啦!
 
龍脷葉有助清熱化痰、利咽、潤肺、通便,對肺燥特別有效;琵琶葉就可以清肺化痰同止咳;桔餅就有助潤肺同埋紓緩肺熱;椰棗就滋潤同埋補中益氣。今次我都係第一次用椰棗,原來佢都係有豐富鎂鐵,食物纖維同埋胡蘿蔔素。另外佢嘅糖分係單純糖,所以就更加容易消化吸收,可以減輕腸胃負擔。(網上資料)
 
龍梸葉一両、枇杷葉一両、桔餅兩個、海底椰乾一両、椰棗三粒、南北杏一湯匙~

SONY DSC

 
將所有材料洗淨~

SONY DSC

 
桔餅要用水沖一沖,然後切碎~

SONY DSC

 
煲內放大約1.5L水,加入所有材料~

SONY DSC

 
先用大火煲滾~

SONY DSC

 
之後轉用慢火加蓋煲45分鐘~

SONY DSC

 
最後熄火焗10分鐘,就可以飲得啦~

SONY DSC

龍脷葉同桔餅我之前都有煲過,所以小小豬都唔多抗拒,乖乖地飲咗一大杯。我自己就當然密密飲(想快啲清走啲痰嘛),飲落其實都同平時煲嗰啲冇乜大分別,唯一就係比較淡啲,或者係今次改用椰棗關係,我想下次再煲時可以落多兩粒,咁甜味重多少少,應該會更加好飲。
 
不過….話事話,我煲起之後就全日當水咁飲,飲咗三杯之後,又真係好似啲痰少咗,冇困住喉嚨唔上唔落個感覺,我估對我都起到作用呢!
 
 
溫馨提示:
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!