【媽媽有感】新年拜年時遇到令人翻白眼的人和事
2018-02-15
媽媽由細到大嘅農曆新年，都要去各大親友家拜年，今年亦都唔例外。有D親友，幾年都唔會見一次半次，唔知係咪少見嘅原故，他們對您嘅大事小事都顯得特別「關心」，而我就特別怕遇到以下呢類親友！
1.亂說話的人
親友甲： 「做乜唔叫人呀？唔叫人係無禮貌呀！您唔乖呀！唔乖嘅小朋友，無人愛啊！」
親友乙：「下，呢件係您新年新衫呀？邊個買俾您架？咁肉酸嘅！」
親友丙：「您爸媽寧願同阿邊個邊個應酬，都唔得閒理您啦！」
～嘢可以亂食，說話唔可以亂講呀！一年唔見您幾次，就講埋呢ｄ說話！請唔好忽略我小朋友嘅感受～
2.愛比較的人
親友甲：「阿邊個個仔定個女，十個月大時識行啦！（嘩！）您個小朋友連爬都未識呀？會唔會有問題呀？」
親友乙：「仲有阿邊個個老公，今年升職加薪，做佢老婆真係幸福囉！」
親友丙：「喂，您今年考第幾呀？下，阿戊年年都考頭三名喎，您俾Ｄ心機啦！」
～人比人比死人啊！難道您阿爸又係李家Ｘ咩？～
3.零衛生的人
親友甲好似當人地屋企好似係舖頭咁，見嘢就摸，摸完手都唔抹就想摸或餵小朋友食嘢！
食完賀年食品嘅親友乙，嘴又未抹，又徒手撩牙，之後更想哄埋小朋友塊面度表示愛意！（喂！媽媽表示受不了啊！）
～媽唔係懶緊張，而係個人衛生係基本常識啊～
4.假關心的人
親友甲：「您人又靚，條件咁好，做乜無拖拍呀？係咪您眼角高咋？」
親友乙：「您哋仲逗利是呀？下年好派啦！其實您兩個打算幾時結婚啫？有計劃未呀？唔好拖咁耐囉？」
親友丙：「哎呀，您哋年紀都唔細啦，幾時生番個BB玩呀？有BB先熱鬧，先似番個家呀？？？」
親友丁：「幾時生多個呀？唔生？？？個仔／女好孤獨／好悶喎！」
～自己嘅人生就好似係佢嘅事咁～
5.扮專家的人
親友甲乙丙丁ｘＮ：「我話俾您知，湊小朋友唔係咁湊／沖奶粉唔係咁沖／小朋友唔係咁教／小朋友要打下先聽話呀…我以前咁咁咁湊，都湊到佢哋大啦… 然後，下刪１００萬字！！！」
～每個小朋友都係獨一無二，只有父母先係最了解自己嘅小朋友，請別管我嘅管教方式～
6.亂俾嘢的人
請唔好亂俾嘢食我小朋友食呀！雖然未必真係俾咗小朋友食落肚，即使係玩下，其實唔多唔小都破壞緊我哋嘅教育方式。（特別係明知小朋友唔應食太多糖果、汽水呀，有Ｄ親戚就係鍾意同父母唱反調，偷偷地俾小朋友吃喝！）
～請唔好亂俾嘢食我小朋友食呀！請唔好亂俾嘢食我小朋友食呀！請唔好亂俾食我小朋友食呀！～
以上大部分都係我真實遇過嘅情況，雖然我知道有些親友未必有心講呢Ｄ說話／做呢Ｄ行為，可能只係出於佢哋表達愛／關心嘅方式。但人生在世，大家可以聽完就算，唔使太過在意嘅（因為認真便輸了！）。或者簡單回應一句：恭喜～我真係恭喜您啊！（註：當然如果某Ｄ位家長認為會對小朋友造成影響嘅，亦可以用一個婉轉嘅方式去制止，別怕難堪啊！）
哈哈～藉此我們一家都預祝大家新年快樂、身體健康啊！
*********************************
(以上資料更新至撰文當日)
聯絡電郵： alfredbb325@gmail.com
最近開始玩IG，歡迎追縱：allaboutalfred
最近開始玩YouTube，歡迎追縱： allaboutalfred
作者：Alfred 媽媽