【親子好去處】嘉道理農場 - 親親大自然、好多動物睇、賞花 (玩足一日)

2018-02-21


每逢假日都有好多地方想帶小朋友去,但係要集放電、親親大然後、又有好多動物睇、價錢又公道嘅地方你會諗到邊i度? 睇動物免費會去動植物公園,或去俾錢入場嘅海洋公園玩。
 
而我今次介紹呢個地方,雖然都有入場費,但係佢絕對超值,同埋夠你玩足一日。因為佢集親親大自然、睇動物、賞花、行山、野餐於一身嘅「嘉道理農場暨植物園」,絕對係超值同埋值回票價!! 我一家口入場,和牛B未夠5歲係免費,只需要$60就可以玩足一日。 
 
 
   
 
買入場飛嘅時候仲可以買埋觀光巴士車嘅車飛,不過要留意時間表。
 
 
園區嘅地圖需要付$5先有,如果想了解有咩地方行,可以影低、上網Download又或者俾錢買一份地圖。
 
我今日大概下午1時先入場,有少少後悔唔夠早入場,因為呢到比我想像中大,好多斜路/ 樓梯要行。所以如果要推BB車嘅話,都會比較辛苦o架。
 
文末分享我的小貼士,記我留意哦~
 
 
超多動物睇
大花白豬,顏色好分明,幾隻大大隻嘅肥豬豬。豬欄都幾大,入面住咗5隻大花白豬,亦比我想像中唔臭。
 
 
 
 
仲有野豬,可以從高角度去睇野豬。亦可以走入玻璃房近距離睇野豬添呀,我都係第一次見野豬,平時都係睇新聞/ 電視見到。
  
 
野豬旁仲有短吻果蝠 (蝙蝠),赤麂。
 
 
和牛B知道嘉道理農場有猴子睇之後,佢一路都好期待好興奮,到底佢哋會喺邊。
 
 
猴子真係超活躍,入面住咗4隻恆河猴,塊面紅卜卜。
 
  
 
 
野生動物區仲有紅鶴、鱷魚和龜隻。
 
鳥類都有,和牛B第一次近距離見到麻鷹佢興奮到同佢哋Say Hello,之後仲要拎部相機出嚟同佢哋影相。
 
  
 
鸚鵡護理中心,籠入面有鸚鵡,仲有兩隻赤麂添呀。
 
 
 
罕見動物「果子狸」個名就有聽過,但我就未見過。佢對眼好大,好精靈好可愛,雖然佢曾經受過傷,但身手仲係好敏捷。
 
 
 
豹貓,身上有豹紋嘅貓,好似寵物貓嘅外型,但佢哋其實好唔同。
 
 
 
兩棲及爬行動物屋、昆蟲館
個館雖然唔係好大,但已經好齊份,入面有蛇、仲有蛇脫皮嘅標本。
 
    
 
有兩棲及爬行動物屋、魚當然仲有昆蟲館啦,入面有好多昆蟲嘅標本,我哋今次又學多咗嘢啦。
 
 
 
 
 
喺雞欄附近,有艾先生猛禽護理中心,裡面住咗6個品種嘅貓頭鷹。
 
  
 
 
親親大自然
  
呢到有好多裝飾得好靚嘅小花園,有好多花。
 
 
 
實我都好鍾意影花,因為真係好靚!! 花痴入到場一定有排影呀~記得帶部靚相機呀!
 
   
 
呢到仲有蘭花園,如果係蘭花愛好者,真係要入嚟欣賞一下。
 
 
 
我最愛的向日葵花圃,令人好有朝氣呀。
 
 
 
每次去郊外玩,我都會教導和牛B要愛惜花草樹木,唔可以採摘花朵,要識得欣賞佢哋。
 
 
 
遠足行山嘅體驗感
呢到山路比較多,好多展館都會喺山上,所以我哋好似行山咁,又上又落。以和牛B 2歲9個月大嚟講,佢真係好叻,我哋無帶BB車,無再用Hip Seat,而佢尋日都好叻行咗好多路。
 
 
仲大膽地行咗下面嘅石路,仲好開心添呀,係一個好嘅體驗嚟。
 
 
 
藝舍
呢到有動亦有靜,藝舍設有工作坊,可以俾遊客參加。
 
 
 
和牛B喺到專心地穿繩、綁結。
 
  
 
而正門口附近,仲有工作坊。
 
農場禮品店
估唔到呢到都會有禮物買~而我哋亦有收穫。
 
呢到有有機飲品、食物、Tee、書藉、植物出售。
 
  
 
 
 
而最後我哋買咗支有機豆漿、有機全麥烏冬、有機元肉。
豆漿當然即刻飲啦,和牛B仲話好好味,不停飲呀!! 豆味真係好香呀!!
 
 
 
 
休憩場地
呢到地方好大,休憩地方都好多,到處都有花草樹木,真係好舒服。
而園區入面仲有多個供遊客野餐嘅地方,如果想野餐嘅話可以睇一睇地圖嘅確實位置啦。
 
 
園區餐飲
園區入面只有一間小食亭,位置近正門口位置。
   
 
影相靚位
   
 
 
溫韾小貼士:
– 文章有提及過山路、斜路、樓梯比較多,所以如果推BB車嘅話,都好吃力,有啲地方仲要抬起BB車行樓梯先去到。
– 園區地圖要俾$5購買,如果唔想浪費實物地圖,可以預先上網Download定先
– 園區都比較大,如果想行得舒服啲,可以喺入場嘅時候買埋觀光巴士車票,就會舒服少少,但景點只有7個,每個景點有10-15分鐘停留參觀及影相。 (車費: 成人$10, 小童及長者$5, 5歲以下免費)
– 園內有育嬰室,不過地圖無顯示到。而我去左第一個景點就見到有,所以都即刻使用。
(位置近爬行動物觀賞台, 地圖4)
– 園內有野餐區,如果想玩一日嘅話,最好自己帶備足夠食物,因為園區只有一個素食亭,而且係近正門口。
– 進行戶外活動,記得飲多啲水。
– 進行戶外活動,記得準備防蚊措施呀。
 
 
前往方法:
– 東鐵/巴士 於大埔墟或太和站,轉乘64K巴士往元朗西方向,於嘉道理農場暨植物園門前的巴士站下車。 
– 西鐵/巴士 於錦上路站,轉乘64K巴士往大埔方向,於嘉道理農場暨植物園的巴士站下車。 
– 巴士 選乘行走大埔至元朗西的64K巴士,於嘉道理農場暨植物園的巴士站下車。
 
 
 
嘉道理農場暨植物園 Kadoorie Farm and Botanic Garden
 
開放時間: 9:30am – 5pm 
地址: 香港新界大埔林錦公路 
入場費: 12-59歲 $30 / 5-11歲 $15 /5歲以下、60歲或以上長者及合資格殘疾人士免費

————————————————–
Facebook專頁和牛B嘅成長專頁

Instagramwagyubmami

作者:和牛b的成長日記

 

熱門文章

方媛分享女兒功課疑揭母女「約法三章」 郭富城堅持與妻女以廣東話交流
03-07
女子帶遇車禍、終生不能自理前夫改嫁 現任丈夫分擔照顧 餵飯、幫忙洗澡無怨無悔
03-07
病房陪愛兒3日直至去世 媽媽傷心辦喪禮 突然收到兒子訊息 結局超荒謬
03-06
唔怕改壞名︱2024 香港熱門中英文名字 榜首原來係呢個名...
03-08
天瑜腸道蠕動失調 暫時只能注射葡萄糖水 爸爸歷55次電療 癌指數已回復正常水平
03-08