【80後媽咪】在一起
2015-10-16
Hi！我係鴻仔！
又想隨意寫下BLOG！
識我的朋友或者睇開我地Blog的朋友們都會知道我係唔算好鐘意小朋友！
點解唔鐘意小朋友？
可能我怕煩怕嘈…… 要講可以講足一日都得！
我成日都會講：都唔明搞乜，生仔簡直「攞苦黎辛」，又要湊、又要養！
又無時間瞓覺，簡直係身心俱焚，諗番起初生bb的朗朗同細佬簡直係惡夢！
初生bb兩個鐘要起身一次，對於我地無工人姐姐又無其他人幫手的兩公婆，
完全感到無助加無力！
就算而家我成日都會嫌兩個仔好煩，佢地總是多多要求咁。
初初朗朗出世，
老婆曾經問過我：點解你咁唔鐘意朗朗？
我：首先，從理性角度分析下，我日日都要返工，
但每日嘈到我根本唔夠瞓，請問叫我如何喜歡佢呢？
我唔信一見鐘情，但我信日久生情。
由最初我唔明點解一出世就必定要好愛朗朗，
但到而家，我地之間的感情慢慢建立，
感情係需要時間磨合！
久而久之，唔知點解會愛上「在一起」的感覺，
鐘意係屋企一齊唱BIGBANG的歌，
一齊睇住Youtube一齊跳少女時代的LION HEART，
我地三個又會一齊大合唱JESUS LOVE ME YES I KNOW，
又會唱WHEELS ON THE BUS… 我地乜野歌都會唱！
一齊唱一齊跳就係我地三個的相處模式！
我自己就好鐘意睇書，
所以我成日都會建議去圖書館，
我地三個會一齊去圖書館租關於太空、地球、世界的書籍。
我自己好鐘意睇呢D書，
而家連朗朗都鐘意埋太空的書籍，深信外星人的存在。
對月球、銀河都十分好奇，原來我都有少少貢獻！
另外，我總係feel到佢地對我的不離不棄，
時常feel到佢地兩個勁鐘意同我一齊玩！
兩個咁愛我的小朋友，
而我本身又係一個比較感性的人，
我諗我真係被感動啦！
我唔係偉大到好想陪小朋友一齊成長的爸爸，
不過，在一起感覺就係咁奇妙，
人與人之間的相處就係咁，
你感到相處得舒服開心的同時，其實對方都有相同的感覺！
家家有本難念的經，一家唔知一家事，
大家努力啦，只要揾到相處的節奏，已經離幸福不遠！