【傑。斯與晴】帶著小Ｂ去旅行。台中。Peppa Pig粉紅豬小妹超級互動展(含影片)
2018-02-26
促成今次旅程嘅原因除咗因為係小JM嘅生日之外，
就係因為小JM媽發現咗【Peppa Pig粉紅豬小妹超級互動展】，
仲要咁啱正正係台中舉辦，而且仲橫跨小JM嘅生日添！
基於咁多嘅巧合，小JM爸媽就決定為小JM來個生日旅行去慶祝一下！
係出發之前亦都係網上預訂好門票，
到時只要憑SMS就可以入場及換領遊戲劵架啦。
*未滿一歲嘅小B係唔駛買入場卷喔*
如果未能成功於網上購票都唔使擔心，
平日人流唔算好多，可以於到達後再買飛入場都一樣無問題。
溫馨提示：
1.) 場內係唔俾帶BB車嘅，可以先將BB車暫時停泊係BB車放置處，
等玩完出來先再去拎返都無問題。
2.) 基於個人衛生問題，係玩遊戲嗰陣記得要著襪。
3.) 有唔舒服就唔好去玩，要多啲休息啦。
入口處設計係彩虹，所以離遠望去已經會見到。
因為我哋係SMS入場，所以只需要換領遊戲劵就可以入場啦。
每人會有一張遊戲劵，每張遊戲劵會包含四個體驗遊戲門劵，
大小朋友可以憑劵體驗遊戲一次！
一甫進場就已經會見到Peppa Pig 一家及朋友仔們嘅介紹及故事簡介。
場內仲設有多幅不同嘅Peppa 及 George 造型稿及家庭照添。
穿過之後就會見到幾個打卡影相熱點，可以俾小朋友影相留念。
*Peppa’s Birthday Party
*Pig Family Kitchen
*城堡體驗趣
唔單止咁，場內更設有紀念品區，
可以買集章冊、明信片、遊戲劵同襪仔，
唔記得著襪都可以即時買返對呀。
小JM媽我見有得儲紀念印章，結果又敗咗一本。
不過就無買到明信片，而家有啲後悔添。
買完寫好仲可以將明信片放入郵箱，
「斑馬郵差快遞」就會幫你寄去目的地架啦。
遊戲體驗區介紹:
【泥巴好好玩】
Peppa 一家最愛就係雨天嘅時候去踩泥巴，而家小B們就可以嘗試體驗一下，
但靚媽們可以放心，呢個係非一般泥巴，係唔會污糟架，小B們都一齊來踩！踩！踩！