【藝術樂園】問題天天都多

工作室嘅教學日程中，回答小朋友形形式式的問題都佔咗我工作三分之二的時間。

未自己開工作室之前，我對小朋友的提問都會一笑置之，因為同一般人一樣，會抗拒作多餘的解釋 ，覺得解釋咗，佢哋都未必會明，所以但求就手，笑下玩下，佢哋就開始轉移話題。

然而喺開咗工作室之後，我花了很多時間去同小朋友溝通。在我而言，我嘅學生都係好孩子，或者佢哋都會將事情弄反了，但我都會全部聽入耳。

言談之間，我忽然覺得每一個孩子的問題都充滿哲學性：

點解我哋會出世但又會老死？

我哋男仔點解一定唔可以著裙？

大人說的話就一定會啱嗎？

點解唔可以淨係中意玩，一定要返學？

作為成年人，我哋都成日將事情弄得太悲觀，我哋有時根本會直接認為一個孩子的提問，無疑係根據佢哋嘅心智發展而提出，所以就一定係淺白而幼稚，甚至想法有點不循規道矩就輕易判斷為錯、壞和奇異。

小朋友嘅世界體系係通過不斷發問而開闊，而且童年本來就係由好奇心建立出來，發問就係小朋友天生嘅優勢。

回想我哋仲係小朋友嘅時候，怎可能會因為我哋問咗一條大眾認為無知的問題而感到挫折？那麼我們何以當大人以後就直指孩子嘅問題不合邏輯，或者講個敷衍了事嘅答案就完咗件事？