【育兒心得】成功戒掉奶嘴啦!/／3步曲
2018-03-01
和牛B夜晚瞓覺係一個比較扭嘅小朋友，基於初生時嘅生活環境同埋習慣影響之下。
和牛B平日係喺婆婆家過夜，而假日我自己照顧，當時餵母乳嘅我，我可以俾佢埋身食奶瞓覺。
由於和牛B夜晚瞓覺比較扭，為減輕婆婆嘅疲勞及容易照顧，所以喺和牛B大概3個月大時，我就買咗佢人生第一個奶嘴。起初，和牛B都唔鍾意食奶嘴，佢會吐番出嚟。慢慢佢對奶嘴就起咗一份感情，同埋奶嘴癮。
以前出街坐Car Seat、Hip Seat都唔洗食奶嘴，變到一坐Car Seat就要食奶嘴，喺Hip Seat想瞓又一定要有奶嘴先得…
唔知由幾時開始，對奶嘴產生咗呢種強烈嘅依賴。因為和牛B有濕疹，皮膚痕會特別憫，所以俾奶嘴佢都有安撫之用。而我哋喺和牛B大概2歲半開始幫佢戒奶嘴，對佢嚟講兩年幾嘅習慣，突然要改變，明白佢都需要時間習慣嘅。所以我唔會一下子全部情況都唔准佢食奶嘴，佢崩潰大喊喊好耐時，大人都唔好受。
第一步：Car Seat
而戒奶嘴，我哋分咗3步曲。首先當然係戒唔係最常遇嘅情景，就係坐Car Seat食奶嘴。不過，食慣咗突然要戒，父母真係要忍耐一下。佢哋嘅堅持係可以好持久，會不停扭同埋喊。而我哋就會不停分散佢注意力，叫佢一齊唱下兒歌、帶啲小玩具上車、睇下窗外面有啲乜，例如話我見到月亮先生呀。
戒期：大概4-6次車程
第二步：Hip Seat
坐Hip Seat時戒掉奶嘴瞓覺，其實呢個相對地容易得多。因為佢寧願唔瞓，都要食奶嘴，咁所以唔需要做啲咩，總之無奶嘴就唔瞓。久而久之，佢太重之下我都無再用Hip Seat。
第三步：瞓覺
瞓覺食奶嘴相信好多BB都會有呢個習慣，和牛B都唔例外。而作為一個在職媽媽，喺唔想影響日常工作情況下，我揀咗長假期(農曆新年假)開始幫和牛B戒奶嘴。
瞓覺食奶嘴相信好多BB都會有呢個習慣，和牛B都唔例外。而作為一個在職媽媽，喺唔想影響日常工作情況下，我揀咗長假期(農曆新年假)開始幫和牛B戒奶嘴。
當然要有個開場白，其實呢個方法未必係100%好，但對我哋和牛B嚟講係有效，而且係估唔到咁快就戒得甩。
和牛B姨媽有咗BB，而和牛B亦一直好期待表弟出世仲好錫表弟。所以我哋就同和牛B講佢大個女唔需要再食奶嘴，奶嘴就送俾表弟啦。而以上嘅對話我就喺日常時間同和牛B講，而佢係應承咗。所以到睡前，當佢要求奶嘴嘅時候我就會重複及提醒返佢，佢應承咗戒奶嘴同埋俾表弟。
而我最估唔到，佢只係喊咗1聲就無再要求，仲好乖合埋眼瞓覺。持續咗3晚，我哋就成功戒咗了。
戒期：3晚
奶嘴，本身係一樣幾矛盾嘅安撫物品。BB瞓覺需要有安全感，咬住奶嘴啜下啜下就會有安慰。但用得太耐，我又會擔心影響佢牙形會生得唔靚，甚至乎哨牙。不過凡事無對與錯嘅，只要家長覺得係適合同有需要就要用。
