| 日期 | 全年適用 |
我地帶咗小JM去九展嘅Wellcome Paradise 宏美兒童樂園，又可以玩餐飽啦！
無他嘅，因為而家做緊新張優惠HKD$200玩足4小時，一共係兩節嘅時間，
咁近屋企，就緊係繼續去幫小JM無限放電啦！
Wellcome Paradise位於九龍灣國際展貿中心，場地總面積超過九千平方呎，空間夠寬敞，有足夠空間俾小朋友走動，同時亦擁有全港最大型嘅兒童波波池之一。
場內設有大型綜合攀爬設施及互動遊戲組合，設計極具特色，而且仲集遊樂設施、教育配套及表演項目於一身添。
Wellcome Paradise嘅管理團隊具國際兒童教育經驗，由國際幼稚園嘅周校長帶領團隊授課架！
更為6個月至10歲小朋友們度身訂造不同類型嘅遊戲小組及興趣班等，而且仲會分為：學齡前幼兒遊戲組 及 集體遊戲添架。
遊戲班小簡介：
學齡前幼兒遊戲組：
主要針對1歲半至2歲半嘅小B，透過講故事、唱歌及有系統性嘅小遊戲去啟發小B們嘅好奇心、創意思維、學習人與人之間相處及遵守紀律等。
集體遊戲：
主要透過唔同形式互動及創意遊戲令小朋友有更多機會參與群體活動，從而發展社交能力及情緒表達。
真係極具教育意義之餘，更係親子學習及遊玩嘅家庭假日好去處，
亦係一個可以提升親子關係嘅好地方添。
聽講來緊仲會有試堂優惠推添，要密切留意一下Wellcome Paradise嘅公佈啦。
事不而遲，係時候為大家介紹一下Wellcome Paradise呢個極具特色嘅Playhouse啦!
一上電梯就已經見到門口，最吸晴嘅莫過於位於門口地下嘅投射互動屏幕。
真係令小JM未玩先興奮！
門口嘅左手邊設有一個大型鞋仔存放處及BB車停泊處。
除咗街之後臨入場前都要記得配戴手帶同用搓手液洗手先好進場呀。
溫馨提示：
1.) 基於個人衛生問題，記得要著襪喔。
2.) 有唔舒服就唔好去玩，要多啲休息。
3.) 為咗保持整潔，場內係唔可以飲食架。
進場前記得將物品鎖好係儲物櫃喔。
*場內嘅樹幹係用真樹而整成架，所以像真度十足呢！*
場內嘅遊樂設施既安全又好玩，而且場內嘅周邊設備亦夠晒完善貼心，
唔單止設有儲物櫃、嬰兒車停泊處、鞋架及專用清洗波波機等，
更設有獨立哺乳室添！
一進場已經可以感受到空間有幾咁寬敞舒適，
莫講話啱小朋友玩，就連小JM爸都俾呢度吸引埋一份！
場內設施介紹：
「波波潭」
可以話係場內場外都極為吸引嘅一個場區。
未進場前小JM爸已經被呢個「波波潭」所吸引，隔住玻璃窗都睇到變咗心心眼。
波波潭係由150,000個波波組成嘅巨型波波池 ，中心設有樹幹造型嘅繩網可以俾小朋友攀爬。
樹幹仲係連接住頂層嘅「宏美林蔭」歷奇繩網陣添架！
波波潭內有一條半透明設計嘅旋轉滑梯，可以由上層一滑而下，進入波波潭內。
而旁邊亦設有互動投影設施俾小朋友們大展身手，投擲波波。
*小JM竟然當咗樹幹內嘅網層係網床喔！*
如果小朋友太細玩唔到波波潭都唔怕，因為場內仲有兩個為小B而設嘅波波泉架！
呢個細嘅波波泉一樣有互動投影設施，仲可以當滑梯來玩添架，
旁邊亦配有攀爬設備俾小B們自己爬上爬落，訓練下大小肌肉添!
「宏美林蔭」
繩網陣位於波波潭上方，與樹幹造型嘅繩網連接。
小朋友們可以爬上爬落一樣得，小JM雖然細但要爬都一樣可以，只係有啲雞手鴨腳咁囉！
小JM上到來頂頂呢個繩網陣一樣無有怕，照樣跑照樣跳，快到想捉都捉唔住。
除咗繩網陣，頂層角落仲有一個「蜂之谷」，
不過要去蜂之谷嘅話就要考一考膽量，走過獨木橋先得啦。
蜂之谷設計成有如蜂巢狀嘅攀爬架以供小朋友攀登。
「天際飛躍」
大型彈床，啱晒小JM呢個鍾意蹦蹦跳嘅小朋友。
小JM每逢見到彈床都總係跳唔停，有時仲要扮野叫爸爸救添。
「奇幻探索」
設有多條通道以到達場內其他綜合攀爬區域。
旁邊更設有一個供小B玩嘅波波池及四管道滑梯添架。
＊從水管而上可以去到波波潭區及歷奇繩網陣
＊從旁邊小拱門位置而上就可以到達小滑梯
＊若從彩色攀爬通道游走亦可以到達波波潭區及歷奇繩網陣
睇完文字版唔夠喉? 咁就睇埋個足本版Video啦!
Wellcome Paradise 宏美兒童樂園
地址：香港九龍灣展貿徑1號九龍灣國際展貿中心3樓302號舖
開放時間：9:30am – 7:00pm
對象：6個月至10歲小朋友
費用：
早上至下午時段 (9:30am – 2:30pm)為興趣遊戲班，分為3節，每節1小時30分，費用為$200 （1大人1小孩）
下午至黃昏時段 (2:00pm – 6:15pm)為公眾玩樂，分為2節，每節2小時，新張期費用為$200 (1大人1小孩)，可玩足4小時。
如加多1個大人，另收$60
如加多1個小朋友，另收$140