【慈慧幼苗】唔好擦晒我啲字啦(圈出錯處Vs尋找美善)
2018-03-22
星期天,我閑賦在家,突然收到朋友來電,要向我說一件開心事,我當然洗耳恭聽。
朋友:「上次同你講囡囡寫字好核突,次次我要擦晒佢啲字,叫佢再寫過先交俾老師,但佢每次都好唔情願去寫,仲扭晒計咁,嚴重影響我同佢之間嘅關係。」
我:「梗係記得喇!你嗰次仲話囡囡變本加厲,啲字愈寫愈醜樣添,搞到你都唔知點算好,打電話向我求救。」
朋友:「係呀,後來經你提醒同反省後,我用咗正面嘅方法去鼓勵囡囡,圈咗佢寫得好嘅字,讚賞佢寫啲字好似老師寫嘅咁靚。之後佢就愈寫愈靚,最初差不多個個字都要重寫,依家只有一、兩個,真係好大進步,令我好開心,解決咗呢個日日都要面對嘅難題。而家同阿囡做功課變得輕鬆好多,好多謝你提點我呀!」
我:「大家咁熟,唔使客氣喇!其實父母抱著正面嘅態度同方法去欣賞小朋友做得好嘅地方,不但有效改善佢哋嘅不當行為,更可以促進親子關係添!我哋咁耐無見,下次帶埋囡囡一齊出嚟食嘢啦!」
解說:
現今的社會,父母大多採用圈出錯處的方法來糾正小朋友的欠佳的行為表現,以寫字為例,父母會覺得子女寫字很「醜樣」,圈出「醜樣」的字,甚至強迫小朋友重寫,否定小朋友付出的努力及能力,令他們變得愈來愈無動力、無自信,好氣餒,以致愈寫愈差,甚至討厭寫字、逃避寫字……
其實,如文中的朋友一樣,當父母採用正面的態度和方法,去讚賞和欣賞小朋友做得好的地方,這樣不但可以增加他們的自信心,令他們覺得自己有能力完成,從而糾正不當行為的出現,而且同時避免破壞親子關係,一舉多得。所以,父母宜多發掘小朋友做得好的地方,勿經常挑剔!
點‧醒‧家長:
- 父母透過正面和有效的方法,欣賞小朋友做得好的地方,令他們增加自信、動力,有助糾正他們的不當行為。
- 多欣賞,多動力;少挑剔,少氣餒!
由慈慧幼苗親子學堂 註冊社工Rainbow 提供
慈慧幼苗互動資源平台babyparent.org,教你把握小朋友6歲前嘅黃金期,由香港理工大學同香港大學【教兒樂】專責社工主理育兒管教環節,香港大學李嘉誠醫學院兒科教授負責嬰幼兒醫護範疇,滙聚資深教育心理學家同言語治療師等,為你提供免費同及時嘅專業解答。
歡迎你like我哋Facebook Fan Page:Healthy Seed Parenting
作者:慈慧幼苗
相關文章: