【許許與小BELLA】親子營養食譜:迷你三文治飯糰
2018-03-23
呢款三文治飯糰係無心插柳咁做出來的。
有日中午打開雪櫃,
見到仲有三文魚同南瓜,
本來唸住用嚟煲粥仔俾Bella,
而我自己一人嘅午餐多數都係出街買外賣,
不過當日落雨又濕又悶熱,
結果唔煲粥喇,
用D食材整樣嘢Bella同我都可以食啦,
所以就快手去洗米煲飯,
整三文治飯糰。
材料夠晒簡單,就係三文魚&南瓜,
其實仲有烚蛋的,
但隻蛋一直係煲入面烚差D忘記咗佢,
所以Bella媽無影相,
大家記得要加蛋,加咗好味好多嫁。
將南瓜同三文魚蒸熟把壓碎,拌勻。
再將烚蛋切碎加入拌勻。
紫菜我用我是這款BB紫菜。
可以先將飯鋪喺紫菜上面,
鋪餡料,然後剪成三角形,
再把另一片無餡的也剪成三角蓋面即成。
其實大家可以做正方形,
但因我覺得對Bella來說太大,
剪成三角形嘅大小尺寸就最適合Bella。
大家可能會問我點解唔索性做飯卷,
原因係做飯卷只能包入好少餡料,
包太多又太大件Bella食唔到,
做三文治就解決到了。
就這樣,Bella唔使又食悶悶粥,
我又可以一齊食埋,唔好見佢的的骰骰,
好飽肚又有營養的呀!