【小小豬廚房】動手做Hea爆梳乎蛋布甸
2015-10-30
話說由暑假開始,梳乎蛋呢個熱潮可以話係有增冇減,不過佢嗰個HEA樣又真係幾可愛,搞到我都有少少鍾意左佢添。
早前見到有朋友仔買左一款食玩梳乎蛋布甸,整法超簡單又可愛,當然好想又買份返黎同小小豬一齊玩下。但搵左好耐都係買唔到,終於俾我唔覺意係屋企附近小店買到,見價錢又唔係好貴,所以就同小小豬買份返黎玩下啦!
一包就有兩包材料粉同埋梳乎蛋模具,只需要額外加牛奶就得啦!
首先將黃色粉倒入碗內。
之後利用模具中的牛奶格,倒入兩格牛奶份量。
慢慢攪勻。
食譜教係放入微波爐加熱再攪勻,但由於我屋企冇微波爐,所以用明爐隔水蒸一分鐘,其實主要都係等啲粉粉溶解得好啲。
待涼少少,就可以倒入梳乎蛋模具內。
放進雪櫃冷藏大約二至三小時。
凝固之後就可以用牙籤沿着模具邊位,輕輕挑出梳乎蛋。
其實呢個階段都見到可愛的梳乎蛋,不過整埋蛋白就仲似嘛。
將白色粉倒入碗內。
之後利用模具中的牛奶格,倒入一格牛奶份量,努力慢慢攪勻,就做到蛋白。
把蛋白沿着梳乎蛋布甸鋪上。
梳乎蛋布甸就完成啦。
雖然小小豬鋪個蛋白又好似冇咁靚,不過佢都好俾心機整,加埋超級可愛嘅梳乎蛋,都叫可以接受啦。
好老實講,我個人覺得個布甸又真係唔算好好食,因為真係甜左啲啲(可能係我地食唔慣甜嘢啦)。不過,呢啲玩意都預左唔係咁好食,大家志在玩下,整個可愛梳乎蛋。
但其實我買都係為左個模,呢個梳乎蛋模具係可以重用,等我下次用嚟整梳乎蛋啫喱,應該會更加開心…更加好味…哈哈哈!
作者:小小豬的成長日誌