【綿綿媽媽】薑醋預備篇

除了產前補身，其實產後補身都同樣重要，我會希望保留傳統習俗，12朝後向親朋好友派發豬腳薑，所以煲薑醋是不可缺少嘅一個環節~  懷有” 綿綿BB”30週開始，我和老爺奶奶已經開始買定煲薑醋材料。其實我上網睇及問朋友，個個都有不同做法，但我都希望將我的經歷紀錄下來，及分享給大家~

早期所需材料：(份量視乎媽媽需要，暫時約20人份量)

1) 老薑/ 生薑 – 12斤 (買左約$80)

2) 甜醋 -15斤 (我兩隻都有買，total $312，媽媽可以自由選擇)

價錢參考: 八珍-會甜D：$290 (10斤) / $156 (5斤); 同珍-無咁甜：$78 (5斤)

3) 大瓦煲 (今次係朋友俾，如果買最平見過都要$300以上)

後期所需材料 :

1) 黑糯米醋 – 2支 (600毫升一支，每支$26)

2) 豬手豬腳 (無特定份量，因應自己需要)

3) 雞蛋 (無特定份量，因應自己需要)

*** 幸好有老爺奶奶幫手，先可以輕輕鬆鬆去預備

我哋一齊去街市買薑，係長沙灣最平見到 $6/斤

因為薑有好多泥，可以用水洗乾淨及用刷刷走D泥。

洗乾淨後，開始去薑皮，不過原來要用好多時間，我和奶奶一齊削，都削咗5小時以上先完成。Haha ~ 可能我手腳慢。

之後將D薑風乾，我哋等咗3日先完成風乾，不過都好睇天氣而定 (記得每日都反下佢，怕潮濕容易發霉)。

之後將薑切件拍鬆，再放落鑊加少少鹽一同烘炒。

同時間可以將甜醋放入瓦煲煲滾，再將炒香咗嘅薑放入瓦煲內一齊煲，記得醋最好浸過d薑。

第一次煲開慢火煮2小時，之後每星期再煲滾一次，可開慢火滾30分鐘 (注意：煲薑時醋一定要浸過薑面，否則需酌量加入甜醋)。

派送或食用前，將豬手豬腳用滾水飛水15-20分鐘後，用凍水將肥油沖走及瀝乾 (最好拔掉豬手豬腳毛)，再加適量黑糯米醋煲滾，用作調節薑醋甜酸度，再加入豬手以慢火煲至軟腍。如果想豬腳腍D，可以早2-3日放入薑醋煲。而去殼熟雞蛋可以早一晚放，就不會容易變硬，再煲滾就完成了。薑醋煲放置一晚後，等到第二天進食時再煮滾會更加入味啊~ 但呢個step未到，所以暫時未有豬腳薑醋嘅相～ 不過煮法都是作為參考，我見每人都有少少分別，大家可以因應自己喜好去選擇的~

*順產媽媽排清惡露，過咗12日就可以開始食薑醋，而剖腹媽媽就最好過咗20日先開始食薑醋。

最後刮咗留下嘅薑皮，綿綿媽媽唔想浪費，風乾後可以留來坐月時沖涼用。為了方便，我已經將薑皮入晒茶包了，因為之前買落嘅茶包袋太細，所以我預計每次沖涼最小要用5包或以上。

我覺得”綿綿BB”真係俾咗好多回憶及經歷我。因為有咗綿綿，我會不斷上網及問身邊朋友學新知識，原來喺懷孕過程都可以不斷學習，諗番起都覺得好有意義^^

綿綿媽媽的足跡
https://www.facebook.com/sukimama2018/
https://www.mamibuy.com.hk/home/13092
https://wow.esdlife.com/sukimama

作者：綿綿媽媽