【港式執媽】解構產科神秘面紗之 - 老公陪產
2018-04-22
對好多港媽黎講，老公可以陪產幾乎成為入產房生仔最重要既事！而呢條題目都係本執媽考讀助產士入學試既題目
好多研究都講過，丈夫陪產為孕婦提供大量既心理支援、令到孕婦覺得待產時間較易過、增進夫妻感情、讓爸爸體會妻子生產所承受既痛苦、令爸爸更能感受角色轉變等等等
事情有咁理想就好了
😂😂😂有老公陪產的確係好，但老公入去陪產之前都要自己做好心理準備，評估下自己既能力😂點解咁講呢？生產既環境好多時係遠超乎爸爸想像架！
首先，你會有機會見到一個唔知係唔係你老婆既老婆！明明平時個老婆係乖乖女、施施文文聽聽話話，又或者係一個女強人、天不怕地不怕，但眼前果位一肚痛就尖叫、癲床癲席、叫到好似驅魔人既女人係邊個黎架呢？😂😂有機會老婆仲聞笑氣聞到溫溫登登，好飲飲醉酒咁！爸爸呢個時候就成為一個好重要既角色喇！提供心靈支持、幫手抹汗、不斷讚老婆好勇敢好叻等等就一定唔少得喇！好多時如果好怕痛既媽媽見到老公都立即會嗲下，嗲完就會有力量繼續面對肚痛架喇，當然唔係個個媽媽都一秒變驅魔人既，好多都可以控制自己既