【陪月辛酸血淚屎】懶惰媽媽（第三、四集）
2018-04-23
第3日。我去到，如常先放低餸菜，換衫去睇下媽媽先。
我今日再醒啲，除左帶多左幾件衫同口罩，我連褲同袜都帶埋。
諗住臨走時金蟬脫殼，不帶走1片污糟既雲彩。
敲門入房，我見懶惰媽媽仍然攤在床玩電話。
我：早晨吖，今日感覺如何？
懶惰媽媽：今日個胸無咁谷，不過，個傷口好痕，我隔住塊膠布不停搲。
我聽到後，自己同自己講：呢獲X街喇!
我口都震埋：你。。。你有無撕開過塊。。。膠布吖。。。
懶惰媽媽：有吖! 我仲換左新膠布。
我心諗：你屋企有咁大塊膠布？
我：我。。。我幫你睇下。。。先
懶惰媽媽解開啲衫鈕，佢每解1粒，我個心就大力地跳1下，冷汗都出埋。
我1望啲膠布，我忍笑忍得好辛苦。佢用普通細細塊個啲藥水膠布，連成一線咁，貼住開刀那個又長又粗既傷口。
我：你貼到咁，我怕你傷口感染吖，不如起床抹身，食左午飯，去睇睇醫生。
懶惰媽媽：我5想去中環到咁遠吖，你幫我打去樓下商場是旦Book 1間婦科睇下就算。
我：5可以! 你5想去咁遠，近近地去仁啷睇急症。
我請工人姐姐馬上幫助懶惰媽媽起床抹身，我去煲湯煮午飯。