【米豬媽媽】蒲媽媽 - 去街個袋帶D乜
2018-05-05
某日閒碌facebook見到 Ohmyglorgeous – 噢賣歌師奶之軼事 post咗呢張圖
的而且確, 生咗米豬之後, 我已經好耐冇揹過我那個親愛的飛甩雞毛….
連條片都袋唔落啊呢位太太……. 取而代之, 係一個背囊~~ 識我ge朋友都知我個人其實比較細粒, 未生之前一路都好擔心前面揹仔後面揹袋, 我會唔會再矮多2吋, 所以每次執袋去街時都只帶 必需品!!! 務求個袋有咁輕得咁輕~!!!
一齊睇吓我日常去街ge囊中物啦
其實比起我D朋友, 我算係拎得比較小嘢, 我每次出行, 米豬ge必需品就係…
尿片*3+換片墊
玩具*3(間中會換D新野入去)
零食(星星餅一盒+餅仔一包)
飯碗連匙
食物剪
BB速食(購自日本)
水樽連水
安全帶
一包純水濕巾
一包消毒濕巾
而我自己就帶…..
銀包
散銀包
消毒吱手泡
do re mi呢3樣………
我諗冇邊個媽媽夠膽唔帶片片去街
題外話: 呃…… 我喺金鐘試過俾人問借片…….. 問我借片ge係一對唔係好金鐘ge父母同大約3歲ge小男孩…… 個男人話佢個仔屙咗屎但冇片…… 我都好爽手同極速咁拎咗塊片俾佢, 佢仲話計番錢俾我, 不過幾蚊就算啦, 同埋你個仔咁大個, 我米豬條大碼片應該唔啱用囉… 我老公到而家都話我俾人呃咗塊片, 因為俾咗條片嗰家人之後, 等緊車時有個食住煙冇小朋友ge男人堅衰搭訕態度咁走埋嚟問我有冇多塊片可以俾佢…. 細佬就話可能見我一個女人仔揹住個仔又背囊咁, 論論盡盡, 吼我拎片時搶我嘢都唔奇, 總之大家出街就小心啦…….
好, 返返嚟我呢個執袋介紹~~
呢個杯杯係我近期大愛~~~ 本身係用緊munchin個飲管杯, 但係拎出街成日都漏到濕晒, 我就買咗呢隻richell杯俾米豬用~~ 真係唔會點漏到水出來, 同埋最最最重要係….
跟住仲有呢條差幾乎必帶ge安全帶 (from淘寶), 因為其實好多so call有BB櫈ge餐廳, 佢地提供ge只係booster, 未必有安全帶會箍住小朋友, 對住呢D咁細ge BB, 其實有條嘢肋住佢褲浪係安全好多ge~
爸爸話呢條叫相撲帶wo 我其實真心覺得好用, 因為佢後面個封口位其實同hipseat一樣, 係黏貼+扣, 所以都幾穩陣吓~ 同埋佢風褸料, 有時食嘢飲嘢滴污糟咗濕巾一抹就搞掂~
最後……….
就係唔記得帶個頭都唔可以唔記得帶ge 奶嘴 !!!!!!!!!!
奶嘴一定要帶!
奶嘴一定一定要帶!
奶嘴唔可以唔帶!!
(很重要所以說三次!)
放晒入收納袋再放入背囊, 其實都唔係好多嘢啫~~~
前一個後一袋~ 又出發去玩嚕~~~
米豬豬的page~ 每日都update~
歡迎各位like&follow~ 亦都歡迎大家聯絡我同米豬豬一齊試用產品或合作~