【雲我】如何說再見2~睡前碎碎唸 與孩子談生論死
2018-05-06
以下是數天前我跟兩小鬼的真實對話。
小男孩睡前伏在我的大肚腩上,我問小男孩﹕「你覺得你到幾歲,唔再俾爸爸抱你﹖」
「六十九歲!」小男孩一臉正經、卻胡亂的答。
「哈哈哈……」我輕撫小男孩的頭,心想﹕時間過得真快,孩子忽爾長大,已五歲多了,我還可多抱他幾年﹖
「爸爸抱我到八十九歲!」大小姐聲音似銀鈴。
大小姐快九歲了,三十公斤,我想,我有能力多抱她一年,十歲吧!
現在才赫然發現,有了孩子,時間過得特別快。
「爸爸,我好多謝你,幫我揀咗呢間幼稚園,我可以識到好多朋友!我又可以住呢間屋,好近大公園,我好開心呀!」從小到大,我都努力教導男孩要適時表達情感,爸知道你生活愜意。
「爸爸都好多謝你哋,嚟到呢個屋企,等我同媽媽有機會陪你哋一齊長大!同你哋一齊我都好開心!」
「阿爸,話時話(男孩口頭蟬),其實我點解會嚟到呢個屋企,係咪因為我出世嗰時,你哋行過,我就指住你同媽咪,所以你哋就做咗我爸爸媽媽﹖」
「細佬!你咪傻啦!係爸爸嘅精子同媽咪嘅卵子結合,先生到我哋出嚟!你喺媽咪個肚出嚟,點會出咗世先再認媽咪先﹖」大小姐搶白道。
性教育不足……
「咁又係WOR,但係我都未出世,點先知道係要嚟呢度(成為我們的孩子)﹖唔通我未出世就有靈魂﹖」
這道問題,比問局長是否以粵語作為母語更不好答。
「阿細,你又知有靈魂﹖」
「係呀!COCO (玩轉極樂園)入面有講嫁!有亡靈節嫁!我哋死咗又有可能見面。」
「阿爸,你如果死咗會點﹖你會唔會海葬﹖」近日家中幾位長輩相繼仙遊,有機會讓孩子多了解死亡,情感豐富的兩小鬼,亦開始接受,爸媽、身邊其他珍視的,終有一天,都會死亡。
「阿爸鍾意露營行山,又鍾意綠色,如果阿爸死咗,你哋幫阿爸喺紀念花園撒灰啦!但係火化之前,記得將我身體所有仲有用嘅器官,捐晒俾有需要嘅人。」這並不是我第一次向孩子交代「身後事」,可我第一次見大小姐有這麼的反應。
「阿爸,唔好啦!唔好捐啦!咁樣唔好!」大小姐一臉認真地道。
「家姐,你可唔可以講多D俾我聽﹖你好似有D擔心。」
「我怕你捐咗D器官,瞻仰遺容會唔好睇;同埋,如果有靈魂,你又無晒D器官,捐埋對眼又睇唔到我哋,咁點算﹖」大小姐有點激動,小男孩也緊張接力﹕「你個靈魂睇唔到我點算呀﹖」
「首先,無人知道究竟有無靈魂,阿爸自己就唔太相信,死咗就係死咗,唔一定會再見到,所以爸爸一直同你哋講,我好珍惜同你哋『宜家』相處嘅時光,好珍惜每一次送你哋返學,接你哋放學,同埋一齊玩一齊講故事嘅機會,成日都多謝你哋陪住我同媽媽。我希望我哋大家多D關心『宜家』嘅大家,而唔係擔心死咗之後會點,因為我哋可以控制到『宜家』嘅事,但死咗之後係點,阿爸相信無人會知,因為無人可以死完翻生再話俾你知,死咗會點。如果你都係相信有靈魂,阿爸會覺得,靈魂一定可以唔使用任何器官,都可以睇到、感應到你哋,所以阿爸相信,既然靈魂唔會用器官,但活生生嘅人因為病,有需要用我有多、而且用唔著嘅嘢,咁我哋點解唔可以好似我哋平時同朋友分享一樣諗法,去幫下果D病咗好耐嘅人呢﹖家姐你唔使擔心瞻仰爸爸遺容個樣會變咗,會唔好睇,宜家D化妝技術好勁嫁,同爸爸幫你修理D BARBIE公仔一樣,修理完,你哋都唔發覺阿爸同你修理過,係咪﹖」一氣呵成,我信HERE & NOW。
語畢,一陣靜默。然後兩小鬼抱緊我。抱歉,你倆有個奇怪的爸。
「應承阿爸,我哋每一日都愛大家,我哋每一日都珍惜,知無﹖」
兩小鬼點頭。
我發現,他倆,經我一年多的潛移默化,已沒有像以前般,對死亡那種呼天搶地。
當我知道愛的意義
就是沒盡的浪潮
讓你我 可走過今朝 黃貫中《同根》
作者:雲我