【慈慧幼苗】說教要適時 幽默化衝突
2018-06-07
早前,看到朋友在面書上寫了一則帖子,內容是關於管教四歲仔仔方面遇到的困難,我除了「讚好」她的帖子之外,作為她的好朋友,當然要致電關心她,她立即向我大吐苦水。
朋友:「你都知我仔仔一向都乖、好聽話,我每日都會俾兩粒自家製的水果軟糖作下午茶,一向都相安無事。突然有一日佢話想我俾四粒水果軟糖佢食,仲同我講:『你都要聽我話,我有食糖嘅權利。』更不斷扭計,我即場呆了一呆,不知如何反應,然後諗深一層呢句說話咁似曾相識嘅。」
我好奇地問朋友:「小朋友嘅言行舉止很多時都係向身邊人學習,佢會唔會喺其他人度學番嚟?」
朋友靈機一觸:「呀!我諗起平時婆婆湊仔仔時,成日同佢講『要聽媽媽話。』可能咁佢就學咗呢句說話;但我唔明白仔仔點解突然會變得咁曳,仲識得駁嘴添!」
我笑笑口開導她:「其實反映緊你仔仔都幾聰明、學嘢快喎,最後你點處理?」
朋友理正氣壯地道:「我當然堅持唔俾四粒糖佢食,同佢講咗半個鐘道理,話俾佢知食咁多糖無益,會蛀牙,由佢自己冷靜。」
我聽完朋友呻,明白好多時父母都是不停地講道理,但真的有效嗎?