【康妮媽】家有一老 如有一寶
2018-06-13
成為母親四年嘅我對呢個節日仲係好有新鮮感。回憶起剛生完哥哥Aidan時嘅心情真係十分複雜。尤其係坐月期間,簡直百般滋味在心頭,有興奮,有喜悅,有擔憂,有感恩,有感動……但係當中最強烈嘅感覺係「有媽媽真好」!
記得係我懷第一胎嘅中後期開始,我嘅媽媽,即係Aidan同Angie嘅婆婆已經經常嚟我屋企煮好嘢燉靚湯俾我食,而且好細心咁照顧我。直至到生產之後,佢係最忙最緊張嗰個。佢不單要照顧我,為咗讓我有更多時間休息,又幫我照顧BB,好多時餵奶換片照顧BB嘅職責佢都攬晒上身。好幸運地我當時請嘅陪月姨姨都非常盡責,但試問又點及得上有自己既媽媽喺身邊呢?婆婆無條件嘅付出令我深深感受到有媽媽嘅愛係幾咁幸福!
當然,我生完妹妹之後亦唔例外。婆婆除咗照顧哥哥,仲照顧妹妹同埋坐月中嘅我。相信呢個世界上只有媽媽嘅愛先至有咁偉大。多謝我嘅媽媽,孩子嘅婆婆!
直至到而家,Aidan 同Angie 已經分別四歲和兩歲,婆婆仍然一直照顧我哋。因為我係在職媽媽,日間都係外面工作,多得婆婆盡心盡力幫我哋照顧孩子,有時俾我哋仲緊張。這幾年真係辛苦您啦,勞累令您嘅樣子看上去也老了,但您毫無怨言,一心只想我哋健康快樂,我哋感恩有您。