【貓媽媽教室】追奶招數逐個睇
2018-06-13
「全人奶好呀，小朋友聰明啲！」
「餵人奶收身快啲㗎！」
「人奶係BB最好嘅食物」
我夠知啦，有先得㗎！如果我要用五隻字來形容我第一胎20個月的餵人奶經歷，我會用「滴滴皆辛苦」。相信人奶媽先會明白到地獄式追奶有幾咁痛苦，B.B. 飲唔曬啲奶要倒有幾咁心痛，塞奶塞到石頭胸發炎發燒有幾咁辛苦等等。不過一見B.B. 有奶飲就即刻甜到入心！今次第二胎都要繼續努力。
- 如果可以，盡量多點埋身
啲人成日叫人少啲埋身，話因為咁樣會令B.B. 好痴身，又或者咬到蓮姐好痛。以我經驗，只要你忍痛一個月，之後會一點感覺也沒有。
呢個世界好多嘢都講求Demand and Supply ,人奶亦都一樣。B.B. 多需求，媽媽自然會生產多點奶。每當B.B. 吸啜時，都send緊信息比媽媽腦部，刺激造奶。而B.B. 吸啜嘅信號永遠比奶泵強，始終是人同機器嘅分別吧。更何況B.B. 清胸能力一定比較好，清得越好，造奶便會造得更多！
另一樣更重要的便是人奶其實有分日奶同夜奶。研究顯示夜奶成份入面多了很多幫助睡瞓的核苷酸（nucleotides)。如果B.B. 晚上飲了日間泵出來的日奶，你會發現佢可能夜晚會瞓得唔好，甚至唔願瞓，因為日奶面少了核苷酸。掉番轉如果B.B. 在日間飲了媽媽夜晚泵出來的夜奶便會日頭不段睡，形成自我時鐘日夜顛倒。B.B. 瞓得好啲，食得好啲自然會乖乖長肉。如果媽媽真的冇辦法埋身，最好方法便是記下泵出的時間，安排日間比日奶，夜間比夜奶。
