【模範夫婦】結婚5周年 連環放閃 「最佳人夫」陳豪送貴鞋 睇戲捧老婆場

上星期，係娛圈模範夫婦「雙陳」陳豪(Mo)陳茵媺（Aimee）結婚5周年紀念嘅大日子，甜心老婆先喺網上向Honey示愛；「最佳人夫」就帶愛妻浪漫遊「直升機河」，閃到眼盲。慶祝一日又點夠呀！日前下午，呢pair恩愛夫妻撇下三名子女，拍拖外出連睇兩場戲享受二人世界。其中一套係Aimee有份演出嘅新片《某日某月》。滿分人夫仲買對過萬元閃石扣鞋冧妻，O氹到成身pink colour嘅粉紅人妻甜絲絲呢！

47歲嘅型爆人夫陳豪和37歲索爆老婆Aimee 13年6月11日喺巴黎完婚，三年抱三，兩子一女分別4歲半至兩歲，一家五口好幸福。月中，適逢「雙陳」木婚紀念日，阿Mo夫婦放下小朋友展開甜蜜之旅，Aimee喺個人網誌放咗條sweet爆短片，明顯由老公陳豪揸機，直擊坐直升機，疑似飛咗去澳門撐枱腳。

難得阿Mo未開劇有時間陪老婆，日前中午，陳氏夫婦先去太古城中心睇《某日某月》。見薄妝陳太穿上粉紅色裙配Hermes粉紅色garden party手袋，化身粉紅人妻，小鳥依人同man爆老公出街。捧完太太場，二人再拖手現身置地廣場。搞乜呢？原來前一日Aimee去咗名店Roger Vivier睇中一對白底閃石扣拖鞋，鞋上有車厘子圖案，好鬼cute，售價$11,900，由於未有貨，人妻訂鞋先，翌日拉埋老公去買，萬零蚊O氹老婆歡心，抵啦！