真係話咁快又到暑假，每年呢個時間都會去海洋公園大玩一番，今年主題由「夏水禮」變做「動感嘉年華」，入場睇Show勁歌熱舞。（威威天地一樣有得玩水玩泡泡）同哥哥呀芊由朝玩到晚超High！雖然今年主題唔係「夏水禮」，但係在威威天地同樣有「威威嬉水泡泡陣」（記住只適合於130厘米或以下之小童）。
兩個入到場就已經自己搵方法玩。
冇幾耐就開始有「加勒比夏日巡遊」，地點就係夢幻水都附近（即係入場後不遠的大噴水池位置），佢哋會分別在幾個點進行巡遊，包保你喺任何位置都可以清楚睇到。
巡遊以海洋生物、野生動物及雀鳥為主題，即係所有小朋友都鍾意嘅嘢啦！
一眾舞者一齊大跳熱舞，跟住仲大玩水槍，噴到在場觀眾濕晒身，超爽！
哥哥仲俾其中一個外國Dancer帶咗出去跳舞，呢個怕醜仔出到去又望住我唔知點算，真係要帶佢多啲出嚟見下世面。
睇到熱辣辣，我哋就入去怡慶坊睇雜技表演，順便過一過冷河涼涼冷氣。
