【孖吉】1歲寶寶健康院檢查及測試

孖吉一歲啦，除咗要為佢慶祝外，就係要番健康院打針同檢查啦。因為孖吉喺預約當日發燒入咗醫院（Link: 病在兒身痛在母心之孖吉第一次住院），所以被逼要改遲10日再去打針啦。

去到健康院，第一時間要去登記處登記，記得要帶寶寶嘅針卡同健康院手冊，方便人員做紀錄。

檢查第一步：量體重

當日下午來到，首要例行工作就係磅重。孖吉就要除晒衫除剩低條尿片，然後上磅量度重量。

注意事項1：2個月以上可以著片片磅重；2個月以下就剝光豬啦！

注意事項2：除非太輕或太重（跟據生長線決定），否則姑娘好少會主動為寶寶度高。

檢查第二步：見姑娘進行健康及發展監察

首先，姑娘會問父母、監護人一啲問題：

1. 平時邊個負責照顧孖吉？

2. 一日食幾多餐固體，每次食幾多；飲幾多餐奶，每次飲幾多安？

3. 加固情況及進度？餵粥定軟飯？有冇食魚、菜、肉？

姑娘建議早餐可轉食通粉之類，下午茶食餅乾、麵包麥包、水果、芝士等等。

4. 玩具種類。

姑娘建議孖吉呢個年齡可以俾洋娃娃佢玩，教佢餵洋娃娃飲奶同餵食；另外都建議俾煮飯仔玩具或積木俾孖吉玩。