【第一次入產房當值】醫學生驚嘆:原來媽媽被推入產房到小朋友出世,只係六分鐘
2018-08-24
作為媽媽,甚至不少爸爸都有入過產房陪老婆生仔,雖然抱著初生孩子的感覺比任何都甜蜜,但媽媽對產房的印象可能剩下「好痛」的回憶,而爸爸可能是「血淋淋」的場面。那麼,在外人看來,產房又是如何的一個情境?
醫學生Dr. Who 在自己的Facebook專頁記下了自己在產房第一次當值的戰況,他搞笑地形容當時的情況很神奇,竟然有一班人對住一個女士嘅陰部怒吼。不如爸媽都一起看看這位醫學生對產房戰況的描述,相信你一定會有共鳴!
———-
係醫學院嘅尾聲,最常聽到嘅問題一定係「你有冇想入邊一個專科」。而好多人都會話,當你讀到嗰一科,你就會感覺到自己適唔適合。
讀到婦產科,小島學堂規定每一個學生都要去產房當幾次值,幫手接生,即係我地叫嘅「執仔」。試過自然分娩嘅女士都一定見過產房嘅戰況,而我都仲記得自己第一次當值…
一去到產房換衫,就見到助產士們圍咗喺護士站吹水,旁邊係一塊大過我屋企電視三倍嘅熒幕,上面寫晒產房依家有幾多個準媽媽喺度等緊生仔、每一個人嘅基本病史、宮頸開咗幾多度之類,有經驗嘅一望塊板就會知道大概仲要等幾耐。由於毫無起色,我都坐咗喺護士站發呆。
突然,電話響起。護士長聽完電話,企起身大嗌「對面推人入嚟!SROM,fully,直入產六!」 (快譯通:穿咗羊水、宮頸已經全開,由對面病房直送入六號產房),成班 HCA 同埋助產士就一齊彈起晒身衝去執嘢,係十秒內成個護士站無晒人,剩番我一個發白日夢發到流晒口水。