【唯媽】好書推介 有助幼兒克服分離焦慮的4本繪本
2018-08-29
初初擔心唯b返學會唔慣,喺書展買咗四本關於返學嘅書,同佢講吓故事,令佢有啲返學嘅概念。
好彩佢好鍾意返學,️老師話佢好快已經適應咗:)
現在,我依然每日都同佢睇呢四本書,同大家分享一下。
1. 《我要去幼稚園》
以搞笑形式講解返幼稚園有咩做,描述小朋友初頭唔想返學,中間知道返學原來好有趣,到最後有一班超人走出嚟話:「我哋要去幼稚園」!我每次跟超人做手勢,加誇張啲講:「我哋要返學呀!」唯b都笑得好開心,依家朝早會同我講一次:「我要返學呀!」
值得買嘅原因
-繪圖好靚,顏色鮮豔好吸引。
-俾小朋友知道佢哋嘅憂慮大人係理解嘅,但返學其實並唔可怕,會有好多好玩嘅活動:唱歌、聽故事等等,仲有好多小朋友一齊玩。
-可以同小朋友預告、重溫返學嘅情景,令佢哋快啲熟悉返學嘅日常事。