等咗咁多年終於有機會到「黑暗中對話體驗館」,雖然係第一次來體驗,但同時亦可能係最後一次,因為租約期滿後暫時停止運作,最終營業日為2018年9月30日…
「黑暗中對話體驗館」最低入場年齡資格都要5歲,所以一直打算等芊芊夠5歲先至全家出動去體驗一次。
我覺得可以用又驚、又喜、又刺激、又感動去形容今次的體驗,不過體驗館營業到9月30日,我實在很鼓勵大家把握這個月內去體驗一次。
如果大家真的計劃去體驗一次,就不要再看下去了,哈哈~因為下文嚴重劇透。
其實體驗館提供不同類型的黑暗體驗,有「黑暗中對話體驗」、「出雙入對情人之旅」、「愛家樂-溫馨之旅」、「暗中夜宴」及「暗中生日會」(聽個名都知道內容為甚麼對象而設吧!)
未入場先興奮,因為芊芊已經俾呢隻大啤啤吸引咗過去。
原本有打算參加「愛家樂-溫馨之旅」,不過想參與的日子名額已滿,所以就選擇了「黑暗中對話體驗」,每組最多8人,我們一家四口同另外兩對情侶參加(應該係除非唔係)。
當完成網上報名後,於體驗日期前一天會以whatsapp提醒參加者,實在好貼心!由於唔想錯過任何一個環節,所以都跟職員指示早15分鐘就到現場準備,既然未入場體驗就先周圍參觀一下。
除了有些紀念品售賣外,仲有一個意見牆,大家都將體驗後的感覺寫上Memo紙貼在牆上。