【Dr Who】當產房遇上綠色黏液...BB喊聲原來可以令人咁感動
2018-09-07
普遍人對婦產科嘅反應都好兩極。喜歡嘅同學會將人哋個仔視如己出,人哋生仔佢感動;不太喜歡嘅人望住個仔都無動於衷,人哋生仔佢大嗌「異型呀!」
從一開始就睇 Dr Who 嘅人都知道,小弟唔係抗拒婦產科,但總係搵唔到人哋成日講嘅個種感動。上一篇有讀者話我唔尊重助產士,今次我就同大家分享一個群策群力嘅故事。(整乜好似榕樹頭講故咁樣…)
唔記得係第幾次嘅當值,大熒幕上面寫咗幾個孕婦嘅資料,全部產前檢查都正正常常,大家估計應該都幾輕鬆。 ⠀⠀⠀⠀⠀⠀⠀⠀⠀
「產三拆牀!」
HCA 即刻行入三號產房幫準媽媽擺好「鋪士」,放好張牀,預備生 B。因為成件事正正常常,我同助產士都用正常速度,正常地換衫。埋到位,大家都開始「手拉腳撐,痾呀!」。痾咗幾下,一泡綠色嘅黏液係媽媽嘅陰道流出。
「Thick MSL!Call MO!Call paedi!」
嗰堆黏液其實就係羊水。叫得做「水」,大家都估到本應係咩款;叫得 Thick MSL,即係話佢又綠又濃,通常反映 BB 係宮內出現過問題,所以要即刻召黎產科同兒科嘅醫生。