【黃庭桄】問我

年少，真的是無知，時常會問一些儍兮兮的問題，往往要在若干年後，才能在眼淚中找到，教人黯然的答案。

初到殯儀館的靈堂，看見熟悉的親人，躺在棺木裏，會問：「點解佢塊面化咗妝？口唇搽到咁紅嘅？點解佢掛住瞓覺，咁耐都唔起身嘅？」人人都紅了眼，沒有答你。

見到同學仔有名貴房車接送，有工人服侍拎書包，零用錢一星期閒閒哋有一千幾百元，而自己的口袋裏，只有幾個硬幣，不期然會問：「點解人哋咁有錢？我屋企就咁窮嘅？點解我阿爸冇私家車揸嘅？」

拖着媽媽的手到街市買餸，途經賣魚檔，見到一條條魚被劏開一半，身上的魚鰾仍在跳動，魚嘴掙扎地一張一合，眼睛睜睜地看着自己，你問媽媽：「啲魚好慘呀，流好多血，一定好痛囉！有咩方法可以救到佢哋？」

每天早上，當爸爸換過衣服，準備出門上班，仍是童稚的你，扯着爸爸的衫尾，嚷叫要他留下來陪你玩，爸爸安撫你：「爸爸要返工賺錢，先至可以買到玩具畀你玩嘛！」

你不明白，反問：「唔返工就賺唔到錢咩？」可是，今天你更深深體會，即使如何努力工作， 一份雞碎咁多的人工，依然是賺不到錢、買不起樓。

情竇初開，未知道情是何物，以為愛上一個人，便會一生一世，永遠不分開，牽手到老。怎會猜到，有時是對方變心，有時是自己不想再愛下去。曾經相連的兩顆心，從此各走陌路。「在對的時間，愛上對的人，真的咁難嗎？」有些人，窮了一生，才找到黯然的答案。

作者：黃庭桄

星島日報授權轉載