【Adrian Ng】我是留英碩士，回港點解搵唔到工？

適逢開學季，新一批學子陸續開學，亦有批應屆畢業生相應回港。最近就有個啱啱在英國讀完Master的舊生向我訴苦，「Send CV都Send了兩個月，回音唔算多，點解會咁㗎？我係碩士嚄！」其實，現在出國留學並非什麼新鮮事，HR每天收無數CV，恐怕過半都是留學生吧？只是，怎樣讓自己在眾多回流生中突圍而出?

揀科切勿隨波逐流 謹記彰顯獨特性

好多人有個觀念，認為讀大學「你的學科如何，你的命運也必如何」。幾年前興讀BBA、工程、律師、藥劑，宜家十之八九都說要讀電腦、醫護、營養 、乜乜物物治療。曾經有學生一開始向我表示想讀哲學，過沒多久又說，家裏姨媽姑姐紛紛勸他「回頭是岸」，讓他讀個 Business回來做iBank。說到底，都是因為這些學科被視為有前途（錢途）。

但所謂「岸」，其實不過是個大型鬥獸場。每年商科畢業生上千個，但永遠大銀行MT位置只有一兩個，若非龍中之鳳， 恐怕最後都係要同其他科的Fresh Grad爭工做。所謂物以罕為貴，當供過於求，價值就會下跌，這個道理相信冇讀過經濟學的人都知。與其人云亦云，隨波逐流，同學仔何不走一條別樹一格的路？

以醫療健康科目為例，相較每年入讀數以「百」來計算的物理治療、職業治療，其實同學可以選擇一些比較特別的科目，如脊醫、放射治療、足部治療等。有些科目之所以少人揀，那是因為不被大眾所了解，但不代表沒有作為。即使是金融大鱷喬治·索羅斯，咪又係讀被姨媽姑姐們唾棄的哲學系。