×

Home

 

爸媽Junior文章打印

來自網址: http://www.ohpama.com/?p=380158

湊仔經 January 9, 2019

【慈慧幼苗】慢慢來 便會快

上星期相約幾位好友茶聚,彼此分享親子管教心得,令我上了寶貴的一課。

朋友A一向做事講求效率,對己對人要求甚高,連管教四歲的仔仔都一樣,「我仔仔每朝換校服都總係慢吞吞,要我三催四請,試過有次返學仲遲到添,所以我每朝對佢講得最多嘅字就係『快』,真係講到口水都乾埋。」

朋友B和應道:「唔止你仔仔,我個女做功課勁慢,小學啲功課又多,成日都做到三更半夜,愈催佢,佢就做得愈慢,跟住就會發脾氣,搞到大家心情都唔好,影響親子關係。」

朋友C:「之前我個仔食飯食到好似蝸牛咁慢,我叫佢食快啲,佢就反問我點解成日都催佢,有時真係俾佢激死。後來有朋友介紹我睇一本叫《牽一隻蝸牛去散步》繪本,故事是講述上帝給作者一個任務,叫他牽一隻蝸牛去散步。作者起初不停催趕,蝸牛仍是爬得這麼慢,後來,他鬆手了,不再催逼,反而自己開始留意到很多以前忽略了的東西:花香、微風、鳥叫,蟲鳴……作者忽然想起來了,莫非他錯了?是上帝叫一隻蝸牛牽他去散步。從這個故事,我提醒自己要慢慢來,唔好催促仔仔,好似牽着蝸牛去散步般,慢慢欣賞沿途風光,享受育兒過程豈不是更好?」

朋友A,B本來你一言我一語地討論着,聽完C的分享,頓時安靜下來,「咁我哋真係要買本繪本睇睇先。」

朋友C繼續分享:「網上有一條真實嘅龜兔賽跑短片,都好值得我哋睇,反思育兒的態度,原來慢慢來,便會快啊!」

於是,大家仿如茅塞頓開,埋首上網找那條龜兔賽跑的短片,畫面認真搞笑。