【靚媽注意】新年扮靚容易忽略的5大地方
2019-01-18
農曆新年就快到,除咗幫小朋友換新衫新鞋,媽媽都會抽時間護膚保養,保持最佳狀態同親戚朋友拜年。不過大家通常只留意面部及服裝,可能忽略其他微細部位,一不留神令印象分打個折扣就唔好喇!各位靚媽不妨注意以下幾點,執靚個樣迎接新年。
1) 頭髮乾旱、現白髮
一頭烏黑順滑嘅秀髮可以令人眼前一亮,不過天氣乾燥,頭髮容易毛燥開叉。加上經常燙染或用不適合的風筒吹髮,都會令髮質變得脆弱,髮絲折斷或加劇脫落情況。亦有部分媽媽生完BB後,白髮增多,企在同齡朋友身邊,望落卻老一大截。
2) 嘴唇爆拆
完美妝容點少得雙唇?但冬天空氣濕度低,嘴唇皮膚薄易出事,容易因缺乏滋潤爆拆流血。影響外觀之餘,上妝效果亦唔理想,好快出現乾紋同脫皮。媽媽記得多搽潤唇膏「打底」,同時避免用舌頭舔嘴唇,加速水分蒸發。
3) 牙齒有漬
所謂「一白遮三醜」,女士們都會做足防曬工夫,保持白滑皮膚,卻忽略咗牙齒美白。好多媽媽鍾意飲咖啡、濃茶同汽水等深色飲料,容易殘留色素,令牙齒變黃起漬。即使每日刷牙,仍未能徹底清除色素,影相露出泛黃牙齒,尷尬死了。
4) 雙手乾燥或有疤痕
雙手做家務時經常接觸水或化學劑,都會令手部皮膚變得乾旱粗糙。戴手套固然可以保護雙手,但好多媽媽少用手套,原因是想用雙手感受碗碟是否潔淨。另外,入廚亦是令雙手遭殃的高危地方,洗瓜切菜煮餸,一不留神切傷燙傷,未有把握護理黃金期更易留有疤痕。試想想伸手出來送新年賀禮,又乾又有疤痕,即使著得幾靚都扣分啦!
5) 衫有霉味
同小朋友去親友家拜年,當然要著得光鮮企理,如果衫褲有一陣霉味,大小朋友都失禮。為何有霉味?其實清洗衣物時,如果沒有深入纖維底層消滅細菌,殘留的污垢和水分會令細菌大量滋生,最後散發霉味;而農曆新年期間天氣通常較為潮濕,如洗衣後將洗衣機關上蓋,洗衣槽便容易發霉,導致衣物沾染霉味。
延伸閱讀:【洗小朋友衫留意】3招避免衣物霉味