【黃庭桄】情人節快樂
上星期家中的老虎乸忽然不經意問我:「這個情人節,你不會有甚麼驚喜活動吧?」
嘩!她如此出其不意的問題,看似漫不經心,並不着重情人節,想為我慳住荷包,彷彿怕我會花幾千元,送上一束九十九枝紅玫瑰。
但人在男女攻防戰的戰場上,萬一我猜錯她的心意,忽略了她其實是在作出暗示,想我「識做」,而我卻懵盛盛,毫無表示,情人節隨時會變成我的盂蘭節,為這段情哀悼喎!
她這個問題,其實跟「我和你媽媽如果跌落海,你會救邊個先?」又有甚麼分別呢?都是難以拆解,左右做人難。
我唯有顧左右而言他,答道:「咁貴買一紮花,只係擺得幾日,就會謝晒,咁就幾千蚊,好唔抵喎!」只見她面色若無其事,我便賣口乖,「所以我預備買一紮椰菜花加西蘭花,都係花啫!送完畀你,你仲可以拎來炒肉片或者帶子,幾好味呀,嘻嘻!」
她禁不住失笑了,厲我一眼說:「無聊!」語雖帶眨意,我知道,她其實甜在心頭。
兩個人相守相愛,要的,是甘苦與共的兩行足印,哪管是雨濛濛,路漫漫,即使是鹹魚白菜也好好味,不用十卡鑽戒,毋須九百九十九枝玫瑰,都會愛在心內暖。
看過一則網絡短片,笑說如果伴侶有童真,日日像過兒童節。如果經常貌合神離,日日都是清明節。如果揀錯伴侶,日日便是愚人節。如果愛得浪漫甜蜜,自然日日都是情人節。