【趙榮德】教「包頂頸」家長用評核報告選幼稚園
2019-03-05
自從二月中與「包頂頸」家長傾談後，他便試讀教育局之評核報告，隔了兩個禮拜，他給我電話，話有甚多問題要向我提出，我答應替他解決一切「奇難雜症」，遂於昨天見面，以下為我們的談話內容：
趙為本人，家為家長
家：趙Sir，我約略睇過教育局之評核報告，我發覺有好多出名幼稚園搵唔到嘅，好似根德園、國際St. Catherine、學之園、維多利亞都冇，點解？
趙：香港幼稚園分三類，一為參加了教育局「 免費優質幼稚園教育政策」嘅免費幼稚園，一為私立獨立幼稚園，一為國際幼稚園，教育局只去免費幼稚園視學，冇去私立獨立同埋國際幼稚園視學，所以你搵唔到嗰兩類幼稚園嘅報告囉 ! 不過，今年有大約750間幼稚園參加了教育局嘅「 免費優質幼稚園教育政策」，當中有好多都辦得出色的，所以你唔憂揀唔到啱你子女讀嘅幼稚園。
家：噢，咁樣，咁每篇質素評核報告都洋洋數千字咁多，你叫我點有心機睇？
趙：其實嗰啲報告全部都跟住一個格式：
- 「學校的持續表現」
- 「學與教」
- 「促進學校自我完善的建議」
家：我知，但係我睇過一啲報告，篇篇都咁上下寫法嘅喎，點知邊間好邊間唔好？
趙：點樣寫法？
家：篇篇都係讚完後彈，咁你問我點揀呀﹗
趙：唔係，有的有讚冇彈。我俾個例子你，你睇睇中西區嘅「明愛凌月仙幼稚園」，你試慢慢由頭到尾讀一次，睇吓搵唔搵到一句彈的句子？