×

Home

 

本地升學文章打印

來自網址: http://www.ohpama.com/?p=419366

教育點評 May 9, 2019

【趙榮德】趙sir,個女唔肯返學,點算?

有位女家長問我是否有時間幫她解決女兒不肯返學的問題,我答可以。以下為她日前的困境和我給她的建議。關心子女求學遇到的問題而不知如何是好的家長,值得一讀:

趙為本人        家為家長

家:趙sir,我不知道如何是好,個女最近話俾我知好驚返學,今日直情不願上校車,我勸佢好耐先肯上車。

趙:個女「好驚返學」至令到佢「唔想返學」?有乜嘢令到佢咁驚?

家:默書。佢間幼稚園K2一個禮拜默足三日書,個女喺學校默書次次都唔合格。

趙:在屋企是否有溫習?

家:有,每日我都喺屋企幫佢溫默書,每一次我都同佢溫到熟先至返學校默,但差不多每次都「肥佬」。

趙:其實佢喺全部默書不合格,還是間中有一、兩次合格?

家:十次有八、九次都不合格,一、兩次合格,但合格都只得50、51分那種,所以我同個女都好失望,因為次次我都幫個女默到好熟。

趙:「好熟」是否指喺屋企你同佢溫到每次都默到90至100分?

家:咁又冇喎,大概溫到70至80分左右。我要佢一次過溫晒成段,等佢可以快啲完成溫習。

趙:不錯,成段咁溫可以快啲,但個女只得70至80分,回到學校驚幾驚,打個6折,化便好易「肥佬」。我提議你同個女一句一句咁溫,雖然時間會長啲,但效果會好好多。如果想更好,以一句一句溫完,再成段一氣呵成溫一次。

家:我未試過,可以試吓。不過,我仍然驚個女喺屋企溫到100%,回校一驚,便又不合格。

趙:是否默書成績差時,老師一定鬧?

家:喺,老師對默書「肥佬」嘅學生特別惡,話佢哋懶,叫佢地勤力啲,又話如果成績唔好會見家長。

趙:女兒一定驚老師見家長,驚被踢出校。你有冇同老師解釋,個女其實已盡全力?

家:有,見過老師一次,我還問老師可否減少默書次數,點知佢話不能,因為那是學校嘅傳統,學校嘅core value (核心價值)

趙:默書竟然喺核心價值咁嚴重,咁你有冇諗過同個女轉校,因諺語有云:「人不能改變別人,只能改變自己。」即喺「你不能改變學校,只能轉校!」

家:轉校?No way!間學校咁出名,我唔捨得轉。我寧願試一試幫個女逐句逐句默,遲一啲訓覺。

趙:既然喺咁,你試吓我果個方法,如果無效,先再傾轉校呢個問題啦!

家:好,多謝趙sir!

結果,家長沒有再來。

叫香港家長唔俾子女讀名校,難過登天!

 

作者:趙榮德

其他文章:

【趙榮德】「孖仔」或「龍鳳胎」選小學策略

【趙榮德】適量遊戲會令小朋友成績好,信心強,抗逆能力高