×

Home

 

專家版圖文章打印

來自網址: http://www.ohpama.com/?p=421463

教育點評 May 16, 2019

【趙榮德】用「三部曲」及「讚賞」在家訓練子女幼稚園面試技巧(1)

有家長問我,幼稚園報名將於九月開始,需否參加面試班,因為好多朋友都替子女報了名,我答其實如果爸爸媽媽有時間,大可以自己在家訓練,家長說:「願聞其詳!」以下便是我和該新手家長的對話:

家為本人 家為家長

家:趙Sir,我對幼稚園一竅不通,可以說是零認識,可否教我如何在家訓練個仔面試?

趙:可以,幼稚園面試大致上會考小朋友的一、認知能力;二、用遊戲考手眼協調、大小肌肉運作及專注力;三、簡單應對;四、EQ:包括禮貌、社交、自理能力;五、與家長面談等五個範疇。

家:咁多,我點識教個仔呀!

趙:睇起來難,做起來不難,最緊要有目標,有正確方法,一步一步咁做,必定成功。

家:咁我是否先要設立一個目標?我個目標係想個仔考入幾間心儀幼稚園。

趙:好,目標最好明確啲,例如加個時間上去:由「5月23日開始,至9月1日訓練好個仔有用的面試技巧;使他考入所有報讀的幼稚園」。

家:明白,有咗以上目標,我會只教個仔「有用的技巧」了。咁我想先學面試考的第一項「認知能力」,究竟點樣在家訓練個仔呢?

趙:幼稚園在認知所考的內容,全都是幼兒認知範圍內的,例如日常幼兒食的水果:蘋果、橙、香蕉、奇異果,所用的杯、碗、匙羹,在街上見到的巴士、的士、私家車、地鐵招牌(logo),書寫用的鉛筆、原子筆、擦紙膠、塗改帶等。

家:我點樣教佢認識以上物品?

趙:用「觀察、模倣、重複」這三部曲,一日內做三至五次便可以。

家:可否舉例?

趙:可以。例如你帶個仔逛超市,見到有紅色的蘋果、橙色的橙和黃色的香蕉。你可以拿起蘋果,對佢講:「呢個係蘋果,蘋果係紅色嘅」,然後問兒子「呢個係乜嘢?」佢會答:「呢個係蘋果」,跟住你可以繼續問:「蘋果係乜嘢顏色㗎?」佢便會答:「蘋果係紅色㗎!」,當佢答對了,你要立即便佢「回饋」:「答對了!」或「答得好!」然後問佢:「我哋玩多次好唔好呀?」個仔一定答:「好呀!」你便可以用「觀、摸、重」這三部曲從蘋果、橙到香蕉玩到佢識為止。其他的物品亦可以用這三部曲來訓練。你會問,每次他答對了,你褒獎佢的「答案」及「行為」:「做得好」、「答得好」、「咁難,你都答到,好!」咁樣嘅feedback(「回饋」叫 positive reinforcement(正面強化)),重點是讚「行為」,千祈唔好讚「人」,例如:「你好叻」,「你係天才」,「無人叻得過你!」

家:點解讚佢叻唔好,我成日咁做呀!

趙:讚佢叻使到佢緊張,心裏有壓刀,例如個仔今次測驗100分,你褒佢:「100分喎,叻仔!」下一次測驗個仔測驗只得80分,你點講,話佢呢次「冇咁叻」?又再下一次佢分數降到60,唔通你話佢蠢咗?不能呀!你只能讚佢嘅行為「勤力」,貶佢「冇咁勤力,懶咗」,叫佢「加油」、「努力啲」!這是在家訓練個仔要記住嘅!

家:明白,要用「三部曲」訓練記憶,要用正確讚賞方法提高佢嘅興趣,多謝趙Sir提點迷津!

 

作者:趙榮德

其他文章:

【趙榮德】趙sir,個女唔肯返學,點算?

【趙榮德】「孖仔」或「龍鳳胎」選小學策略