×

Home

 

專家版圖文章打印

來自網址: http://www.ohpama.com/?p=423636

升小攻略 May 23, 2019

【趙榮德】「叩門」前奏三招

小一統一派位六月一日公佈結果,有家長神色倉惶走來,問我今年校長會否減派「叩門」位?我安慰他,叫他稍安毋燥,以下為家長和我關於「叩門」前奏的對話:

趙為本人        家為家長

家:趙sir,聽聞有議會叫小學今年減派「叩門位」,是否真的?

趙:兩個小學校長議會,因小一適齡人口未來幾年持續下跌,九月新學年便料減八千,為保存大局,便作出「溫馨提示」,呼籲學校教育局派幾多收幾多」唔好減發咁多「叩門位」,不過「叩門位」是小學校長唯一能夠收取自己心儀學生的學位,試問有幾多個校長肯減派叩門位?我認為數目不會多,所以應該係「呼籲有保留,一切會照舊」!唔使驚的。

家:聽過你的解釋,我個心定咗好多。咁六月一號前,我有些乜嘢要做?

趙:你只需做以下三招:一寫一封信,二打一個電話,三畫一幅「路線圖」。

家:就係咁簡單?可否詳細解釋第一招寫一封乜嘢信以及點樣做法?

趙:可以。第一件事要做嘅,係先寫一封叩門「預告信」俾校長作「存案」,以備不時之需,寫「預告信」之目的,係想校長喺六月一日叩門前,知道你寫過一封信俾佢,如果佢睇到你咁有誠意,一家對你同你個仔有好印象;不過,你要先查出校長嘅全名,寫在信封上,咁樣,校長先至會親手拆開封信來睇,如果你只在信封寫上To the Headmaster或To the Principal,咁果封信,便可能落在校長嘅秘書或學校嘅文員手上,跟住被拋入廢紙箱了!

家:明白,咁點樣寫叩門嘅「預告信」呢?

趙:「預告信」簡單直接,一、話你已用「1-1-1」方式申請入讀該校;二、話你個仔嘅性格,與該校學校文化符合,例如該校重視均衡發展,你個仔曾經在幼稚園攞過「品德獎」、「成績獎」及「活動獎」;三、話如果統一派位落空,會再寄另一封信「叩門」,希望校長俾佢一個面試機會。如果家長寫得一手靚字,不妨親筆自己書寫,這樣更加顯出家長的誠意。

家:第二招是打電話,是打俾心儀小學嗎?

趙:是,喺電話問學校「叩門」的日期同時間,是用面試還是筆試,面試是用粵語、普通話,還是英語,申請要填表格還是要寫「叩門信」。叩門試除了帶出世紙,小一註冊證,還需要知道的問得一清二楚。

家:明白。那麼第三招是畫「路線圖」,這幅圖又怎麼畫?

趙:畫這幅圖前,要決定「叩」幾間小學門,我提議你在本校網揀三至五間,他校網揀一至兩間,然後從近至遠畫出一幅叩門路線圖。如果當日要去三間學校叩門,便將三間學校時間需要,列成一路線圖,這樣才得最高效益。

家:趙sir,除了「叩門三招」,還要有甚麼準備?

趙:在家還要和子女準備「叩門面試」和「筆試」,遲些和你再談。

家:多謝趙sir指點!

 

作者:趙榮德

其他文章:

【趙榮德】用「三部曲」及「讚賞」在家訓練子女幼稚園面試技巧(1)

【趙榮德】趙sir,個女唔肯返學,點算?