【90後媽咪】「產前抑鬱」一點一滴 +自己心事無人明
2019-05-24
有咗BB其實係一件好開心嘅事,諗起屋企多咗個新生命,變得好熱鬧真係會好期待! 慢慢去到懷孕嘅後期,自己變到好頹,做咩都無動力,無啦啦會成日都喊,一開始以為自己只係攰,但呢個情況持續咗足足一個月,慢慢先開始懷疑自己可能有產前抑鬱…sad
上網搵咗好多資料,大部分時間情緒低落、做嘢集中唔到精神、無原因咁喊、情緒起伏好大等等,我好多樣都中咗。自己唔想影響BB,但情緒真係好反覆,喊完又會擔心對BB唔好,成個過程就係不停咁重複:心情低落 → 喊 → 擔心影響BB → 心情低落⋯⋯
有時搵身邊嘅朋友去傾,佢哋只會話:「唔好諗咁多啦!」、「正面D啦!」、「喊少陣啦,好小事姐。」等等嘅說話,我心底入面知道佢哋係想鼓勵,但其實我聽完係會更加唔開心。我覺得產前抑鬱同普通抑鬱嘅人都係一樣,唔係樣樣安慰嘅說話都啱我哋聽,我都唔想被情緒控制自己,但D荷爾蒙嘅變化+擔心,真係令到自己好辛苦!我想要嘅安慰其實係好簡單,可能係一個擁抱,同我講:我會喺度陪你架,或者係一個肯聽我講點諗嘅人。好簡單嘅說話,其實已經可以好安慰到我。