【禧。熙。之生活點滴】「媽媽谷」有利有弊，視乎用家心態如何！

曾幾何時我有懷疑過已經生左小朋友既朋友或同事點解要入咁多”媽媽谷”，但當時既我冇深入去考究因爲我未有小朋友。但到左自己懷孕，開始入谷，已經唔記得係點樣入第一個懷孕初生谷, 入左谷之後，發現有好多育兒知識分享，又有實用產品推介，都慳好多時間唔洗自己硏究。入左一個大谷之後，開始進化入啲細既分支谷，分年份，分醫院，分區域，分BB年份/月份等等。

之後禧家姐上playgroup，我都無入過任何有相關資訊既谷，可能當時覺得未有咁既需要，只係playgroup，都只係想俾囡囡岀去玩下，見下其他人，鍛練一下膽量。直到讀N班，有位好好既同班同學家長邀請我入谷，呢個N班媽媽谷係我入谷以來最好傾同時又最窩心既一個谷，媽媽之間會分享學校資訊，小朋友生活點滴，學習分享，婆媳相處問題，夫妻關係，扮靚心得及旅遊資訊等等話題，可以話係無所不談，亦從來感覺唔到家長之間會將孩子作比較。有時湊小朋友湊到心理開始唔平衡或抑鬱既時候，都會互相傾訴及支援，確實心靈上會感到好安慰。