【趙榮德】一個「百答不厭」的小一揀校問題
2019-08-26
本人在幾份報章雜誌,有升學問題專欄,這幾年家長最常問的問題為:
「我曾讀A小學,如果我替兒子申讀A小學會有25分,但我的心儀學校是B小學,如果替兒子申請B小學只有15分,請問我應點辦?」
其實面對以上升學問題,不同性格的人會有不同取向。
對一個「穩陣派」家長,答案非常簡單。怎樣簡單?佢一定選擇替個兒子報讀母校A小學。點解?因為個仔有25分,以呢個分數,有九成入到母校啦,如果選擇報B校,個仔卻有九成變成「陪跑份子」,被K.L.出局。
對一個「搏殺派」家長,一定「咪埋隻眼」揀咗B校先算;自行階段失敗再搏「統一派位」、「統一派位」失敗搏叩門,叩門失敗搏直資等等。
本人是穩陣派,所以會提議家長替子女揀自己讀過嗰間母校,除非家長特別憎厭母校,例如被母校冤枉或冇理由懲罰過。否則,如果只因為母校名氣不及心儀學校,我認為不值得放棄申請母校的。
另一個值得替子女揀家長母校嘅原因是,揀自己嘅母校會有「一連串開心嘅感覺」,開心係來自成功感,有話事權,一切盡在自己控制之中愉悅嘅感覺,而揀B校(心儀小學),卻只會有「一連串痛苦嘅感覺」,痛苦係來自挫敗感,自己冇話事權,一切盡在命運及他人控制之中嘅無助感覺。
你會問,點解而家的家長明知失敗,仍要搏一搏?因為社會改變了,以前嘅社會比較貧乏,有學校收、有書讀、有飯食已經心滿意足了!而家嘅就會比較富裕,大家已不滿足於有書讀,而要讀到自己心儀嗰間先至滿足。有理想,本來冇乜唔好,但如果理想是達唔到嘅便冇用,因為不能達到嘅理想係狂想、係痴想。
如果家長喺自行分配替子女揀一間入唔到的小學,在自行分配「順理成章」被踢出局,在統一派位亦可能因運氣唔好失敗,如果叩門也不成功,便「四大皆空」了,所有話事權盡在別人手上實在難捱呀!
如果用穩陣法,先入了母校,再去心儀小學叩門,成功了便可以入心儀,不成功仍有一校在手,更何況,讀得好還可以申請插班,選擇多的是。
所以,我主張家長替子女揀母校!
作者︰趙榮德
其他文章: