開學上堂似遊魂，就係心散咁簡單？

早前，爸媽忙着為小朋友四處張羅準備開學；開學後，爸媽都要多留意小朋友的學習情況，畢竟過了漫長暑假，一下子未必能適應學校生活。過去兩星期，小朋友有否上堂遊魂、抄漏手冊、忘記帶書本、遺失文具等？如果有，爸媽就要細心觀察，看看是否專注力出現問題！

上堂愛玩擦膠是徵兆

小朋友年紀小，由開心玩樂的暑假生活一下子進入循規蹈矩的學校生活，需要時間適應，精神科專科醫生鄧萬豪表示，剛升小的小朋友情況更為明顯，由於小學要求比幼稚園高，小朋友未必能夠長時間坐定定或跟足指示，需要老師不時提點。如果上堂遊魂、抄漏手冊、忘記帶書本這些情況維持1個月以上，爸媽便可能需要帶小朋友接受專家評估，看看是否專注力出現問題，「專注力不足嘅小朋友特別鍾意喺堂上玩擦膠，因為佢哋專注唔到喺黑板同老師講課上，所以會切擦膠或將擦膠推落地，爸媽可以留意下開學之後有冇買多咗擦膠，或者喺屋企準備出門，三催四請仍然未帶齊隨身物品，好可能同專注力不足有關。」

▲精神科專科醫生鄧萬豪指出，如果暑假夜瞓的習慣延續至開學，小朋友有機會因為睡眠不足難以集中精神，影響專注力。

忽視問題可嚴重影響學業

專注力不足會否隨着小朋友長大有所改善？鄧醫生表示通常不會，而且忽視問題的話，小朋友的負面情緒只會愈積愈多，造成更大影響，「上堂集中唔到、聽唔到書，成績唔好之外仲會被老師罰唔專心聽書，負面情緒得唔到宣洩，壓力愈來愈大，嚴重嘅話會令小朋友出現坐立不安、易發脾氣等焦慮徵狀，大大影響學習進度及校內成績。」因此，鄧醫生建議家長一旦發現有問題，可先跟學校老師商量，再找專業人士處理。

遊戲中學習專注

註冊職業治療師王清欣姑娘(Wendy Wong)說，小朋友經評估後確定有專注力不足的話，她會以遊戲方式讓小朋友練習如何專注，「會給小朋友2張相似的相片找不同地方；如小組的話，會給他們一些複雜指令，透過合作方式完成任務。」除了專門訓練，亦有一些針對專注力的遊戲書可以買回家玩，「爸媽切忌心急要小朋友坐定定玩，不妨先嚟15分鐘遊戲，然後20分鐘，再到2小時，循序漸進等小朋友慢慢適應。」她曾接觸一個個案，初時爸媽以為小朋友「論盡」做漏功課，直到學期後考試，5、6版的試卷做漏了1版，才驚覺問題的嚴重，「小朋友經評估後，專注力相對同齡學生低，經過2、3個月的重點訓練後，情況才好轉過來。」Wendy提醒爸媽，小朋友失魂、甩漏未必只是冒失，如發現有專注力不足徵狀，還是盡早進行評估及找專家幫手。

▲王姑娘表示，小朋友有專注力問題，專家愈早介入，效果愈理想。

了解更多: 心迎兒童與家庭發展及評估中心 (電話:2543 2200)
www.shiningfamily.com/ 或 www.facebook.com/shiningfamily