【禧。熙。之生活點滴】開心迎接二寶嘅同時，千萬不要忘記照顧大寶嘅感受

禧家姐係婆婆屋企嘅第一個孫，由岀世開始已經係萬千寵愛在一身，所有舅父阿姨，親戚朋友都好愛錫佢。

大概喺禧家姐20個月大嘅時候我就有咗熙弟弟。由見肚開始，成個懷孕過程，我同禧爸都盡量俾家姐參與迎接弟弟岀世嘅準備工夫，例如買初生用品、衫褲、BB牀等等，令佢有個意識知道會有弟弟嘅岀現，屋企會多個新成員同埋佢將會成為家姐。佢好似都慢慢接受同明白，每次問佢弟弟喺邊，佢都會指住我個肚話弟弟喺度。

但家姐由岀世到而家主力都係我照顧，無論瞓覺、食飯、沖涼、返學放學，我都同佢一齊，可以講係形影不離！所以當弟弟由醫院返到屋企之後禧家姐嘅行為開始倒退，情緒亦唔太穩定，因為原先就只有佢佔有爸爸媽媽嘅全部愛，大家焦點都放喺佢身上，而家突然間多咗個弟弟，難免佢會唔習慣。

無論我係同弟弟傾計、餵奶、冲涼定係氹瞓覺，家姐都好抗拒，會大叫大喊要媽媽，一定要我抱，甚至曾經動手打過弟弟。行為倒退方面，家姐會要求食奶嘴，會霸住弟弟張牀瞓，要玩佢玩緊嘅玩具，要著弟弟嘅衫等等。另外，家姐嘅心情都好易被弟弟牽動，弟弟喊，佢會話弟弟嘈，會叫佢收聲。