【80後手作媽媽】分享選購BB衫的經驗
2019-11-09
作為媽媽,尤其係生女兒的媽媽,就算寶寶只有2個月大,都一定會好想為寶寶扮靚靚,因此明知BB衫仔只能著數幾次,都會忍唔住手買買買,跟住就幫佢影影影 。其實我自己都算係喺買衫仔方面好克制,因為剛好有大小Sheryl 5個月的糖哥俾衫仔我哋著,即使已經夠晒衫著,我都忍唔住買下衫仔俾小Sheryl著,今次想分享一下買衫仔俾BB的小心得。
喺BB未出世之前,已經有屋企人俾咗啲衫仔我地,又在外面買咗啲,當BB出世後,就發現有部分的衫仔對於我來說唔多實際,例如以下呢啲:
1. 橡筋頭褲仔
我發現小Sheryl在頭1個月都唔喜歡穿褲仔,我指的是只得下半身果種橡根頭褲仔,我懷疑係佢唔喜歡條褲仔Koo住個肚,覺得唔舒服,一穿褲仔就會喊喊,係差唔多到2個月之後先好啲,接受番褲仔。
2. 無包庇鈕的衫仔
市面上有好多BB衫仔賣,有部分係無包庇鈕的,呢種衫仔由於無包庇鈕,而小Sheryl成日都周身郁,所以好容易會戚起晒,露出個Pat Pat,有時仲會露出個肚仔,咁樣怕佢會入風,所以我買咗呢類型衫仔都無再穿了。
3. 過頭笠嘅衫仔
由於我係新手媽媽,而小Sheryl出世時又屬於細碼B,幫佢換衫時我都好驚驚,驚整親佢,又姐手姐腳,所以過頭粒類型嘅衫仔對於我來講很難Handle,所以我都係建議如果係新手媽媽都係選擇前面有鈕全開胸或者綁繩果啲和尚袍會好啲,容易handle啲~