×

Home

 

專家版圖文章打印

來自網址: http://www.ohpama.com/?p=486999

升小熱話 December 12, 2019

【趙榮德】統一派位甲部填表法

最近,有一家長和我談起統一派位甲部填表法。以下為我們的對話,有興趣知道填表的奧妙,宜留心閱讀:

趙為本人  家為家長

家:趙Sir,不如我哋先傾吓甲部應該點樣填,好不?

趙:好,我主張喺甲部三個選擇都填你最心儀小學。

家:趙Sir,我住41校網,我個係仔來嘅,我最鍾意只得喇沙小學一間。咁,係唔係只填這一間,留空兩個選擇,咁會唔會好蝕底?

趙:點解你認為蝕底?你可以喺餘下果兩個格填你最心儀嘅小學!

家:41校網,餘下嘅比較好啲係中華基督教基華小學(九龍塘)及華德小學,但呢兩間都唔係我最心儀嘅小學,咁點算?

趙:咁你可以揀其他校網嘅心儀小學囉!甲部果10%學額係不受校網控制嘅!

家:係咩?我仲以為甲部好似乙部咁,只准揀自己住果個校網㖭,如果其他校網都可以揀,我會揀沙田果兩間呂明才了,多謝趙Sir提醒我。

趙:咁你是否三間都一樣咁鍾意?

家:係,如果派唔到喇沙小學,派沙呂或浸呂我一樣咁開心,因為三間都係我最心儀嘅小學。不過,趙Sir,我想問多句,點解你要我只揀最心儀,唔俾我揀次心儀或三心儀小學呢?

趙:原因好簡單,如果派間次心儀俾他,你開唔開心,願唔願意接受?

家:派間次心儀,當然冇最心儀咁開心,但亦都好過冇喎!

趙:同意,但係,除咗甲部果三個選擇,你重有乙部果三十個選擇喎。你填表嘅目的是幫子女揀最好果間,唔係「求其」揀一間,所以甲部,我主張揀最心儀小學,有一間最心儀便填一間,有兩間便填兩間,三間心儀便填三間。填表的標準是以填最心儀小學為主,而不是一定要填滿三格為主。

家:明白。咁,如果我有三間最心儀,放邊間喺第一位?

趙:如果你想用「三劍合一」搏「叩門」,應該填住址校網果間,如你住41校網,便應填喇沙小學。咁你在「自行分配」已填「喇小」,統一派位乙部第一格再填「喇小」,便是「三劍合一」了,咁填法,會有好大機會搏到「叩門」的!

家:但係如果我自行分配填咗沙呂,統一派位填邊間呢?

趙:咁就視乎你鍾意邊一間多啲了,如果你鍾意喇小,你便在「統一」甲部第一選擇選喇小,造出兩次填喇小效果,希望喇小俾個機會你。如果你鍾意沙呂,便應於「統一」甲部填沙呂了!

家:你意思是,無論如何,冇「三劍」也至少有「兩劍」,咁樣,小學校長先感覺我哋有誠意!

趙:冇錯,「誠意」是叩門之母,就算小朋友叻,校長睇唔到家長嘅誠意,未必會俾個學位你,家長切記!

家:明白,下次,我再向趙Sir請教「乙部填表法」。

 

作者︰趙榮德

其他文章:

【趙榮德】搬去心儀校網的How、Why、When

【趙榮德】小一放榜申請落空仍可以做三件事