【禧。熙。之生活點滴】一片粟米一條紅蘿蔔背後既辛酸
2020-01-08
只係睇兩張相，一定以為肥仔嘜係一個行BLW好叻嘅小朋友。其實呢舊粟米同紅蘿蔔背後都幾辛酸。BLW呢個名相信好多人都認識，Baby Led Weaning（ 簡稱BLW）嬰兒主導斷奶的飲食方式， 簡單嚟講即係將食食物嘅主權交去BB手上，由BB自己用手將食物放入嘴，一個由自己幫自己進食嘅一種技巧。
我係二寶媽，家姐BLW行得唔好，進行BLW幾個月之後，最終都唔成功，主要原因係外來壓力同本身佢唔太願意嘗試新食物。吸取經驗之後想呢一胎可以順利進行。 原因係我得一對手，好難同時餵兩位小朋友食飯。另外BLW又可以同父母一齊食飯，唔洗另外煮飯仔俾佢，因為準備BLW食物多數都係蒸同烚，等小朋友可以食到食物既原味，只要將食物整到軟身，形狀容易攞上手就可以。
BLW 除咗可以幫助小朋友發展，訓練大小肌之外，亦可以培養佢哋對食物嘅興趣，全個進食過程由小朋友做主導，父母唔會參預。所以我都好想俾肥仔嘜試下。
進行BLW，成日會聽到有人話； 你舊食物太大啦，你啃死佢啦呀；食到周圍污糟邋遢；佢係咪唔想食；佢係咪未準備好；你咁樣餵跌晒落地呀，不如唔好食等等。。。。呢啲說話！其實作為媽咪，又點會想整親自己嘅小朋友又或者點會想佢食唔飽。行BLW嘅媽媽真係好需要一份堅持同勇氣，當全世界嘅人都唔明白你既時候，為咗小朋友，你都會硬住頭皮去嘗試同執行。